Иако случаите на инфекција кај вакцинираните луѓе се можни и неизбежни, малку е веројатно дека ќе завршат со хоспитализација или смрт. Но, едно прашање се уште останува неодговорено: Дали можат целосно вакцинираните луѓе да развијат долготраен Ковид?
И додека вакцините се ефикасни во спречување на сериозни и тешки симптоми и смрт, се уште не е познато колкав е ризикот од развивање на пост-Ковид симптоми
Оваа состојба вклучува голем број на симптоми како што се замор, вртоглавица, главоболки, болки во мускулите и проблеми со спиењето. Сето ова може да потрае неколку недели или месеци по официјалното прележување на коронавирусот. Овој феномен се уште е малку истражуван, но се проценува дека помеѓу 10 и 30 проценти од возрасните кои го прележале Ковид-19, го искусуваат па дури и ако имале само благи симптоми на болеста.
Повеќето податоци за долг Ковид се собрани од невакцинирани луѓе, додека ризикот од долг Ковид кај вакцинираните се уште не е доволно истражен.
Прелиминарните истражувања покажуваат дека е можно и вакцинираните луѓе да развијат симптоми кои траат со месеци, но многу прашања се уште не се одговорени. Не е познато колкав е процентот на случаи на зараза кај вакцинираните, што може да резултира со долгорочни симптоми, колку луѓе се опоравуваат и дали овие долгорочни симптоми се исто толку тешки како и кај оние што не се вакцинирани.
„Мислам дека нема доволно информации“, вели д-р Зиџијан Чен, здравствен директор во Центарот за пост-Ковид нега во болницата „Маунт Синај“. „Прерано е да се каже, многу малку вакцинирани луѓе се разболуваат и не постои добар систем за следење на овие пациенти“, додаде тој.
Неодамнешната израелска студија во која учествувале 1.497 вакцинирани здравствени работници покажала дека 39 од нив сеедно се заразиле. Се смета дека тие биле заразени од невакцинирани луѓе, а студијата била спроведена пред делта варијантата да стане доминантна.
- Иако повеќето од заразените биле асимптоматски или имале благи симптоми, седум од 36 инфицирани здравствени работници, исто така, имале симптоми шест недели по инфекцијата. Се работи за губење на мирис, кашлица, исцрпеност, слабост, отежнато дишење и болки во мускулите
Сепак, авторите на студијата се претпазливи во извлекување какви било заклучоци, бидејќи примерокот на испитаници бил премногу мал и фокусот на студијата не бил развој на долгорочен Ковид кај вакцинираните лица.
Меѓутоа, фактот дека се појавиле долгорочни симптоми кај еден од пет заразени е прва индикација дека долготрајниот Ковид е можен и кај вакцинираните луѓе, пишува „Њујорк тајмс“.
