Ниту еден родител не сака да ги слуша своите деца како кашлаат. Кај нас секогаш постои страв дека кашлицата е симптом на бронхитис, ларингитис или дури и пневмонија. Најчесто, сепак, се работи за симптом кој ги придружува повеќето безопасни вирусни инфекции на респираторниот систем. Кај помалите деца вообичаено е да има неколку инфекции на респираторниот систем во сезоната есен/зима предизвикани од разни вируси. Истражувањата покажуваат дека кашлицата е петтиот најчест симптом поради кој посетуваме лекар.
Но, како да му помогнете на детето ако се појави кашлица, која и покрај сите напори и лекови, упорно не поминува? Прво, најважно е да знаеме што никогаш не треба да правиме. Ако вашето дете кашла, немојте да посегнувате по средства за сузбивање на кашлица.
Сирупите против кашлица се небезбедни за помалите деца
„Средствата против кашлица не помагаат, а всушност можат да бидат многу штетни. Прават некои деца да бидат хиперактивни, предизвикуваат вртоглавица и немир пред спиење. Исто така, супресантите за кашлица особено се небезбедни за помалите деца, односно за сите оние кои имаат помалку од четири години“, објаснува педијатарот Кетрин Том-Ревзон.
Но, само затоа што не можете да му понудите на вашето дете средство за сузбивање на кашлицата, не значи дека не можете да направите ништо друго за да му помогнете. Пробајте некои од следниве природни домашни лекови против кашлица.
- Мед
Истражувањата покажаа дека медот е одличен природен лек за ублажување на кашлицата, без разлика за каков тип на кашлица се работи. Сепак, педијатрите предупредуваат дека е подобро да се избегнува мед кај деца под една година.
Медот може да се примени еднократно, а најдобро е тоа да биде пред спиење. Дајте му половина чајна лажичка на дете од една до пет години и една кафена лажичка на деца од шест до 11 години. Ако вашето дете не сака директно да зема мед, можете да му го дадете во топла вода, чај или млеко.
- Пилешка супа
Пилешката супа е многу повеќе од стар народен лек. Истражувањата покажуваат дека има многу антиинфламаторни својства кои можат да ги смират болките во грлото, а исто така делуваат и на ублажување на затнат нос кај децата. Со оглед на тоа дека кашлицата и болките во грлото често се предизвикани од течење на носот, супата помага да се исчистат дишните патишта и да се запре кашлицата.
- Топли пијалаци
Топлите пијалаци се одличен природен лек за кашлица кај малите деца, бидејќи ја разредуваат слузта, што го олеснува кашлањето. Плус, топлата течност го смирува сувото грло и го одржува вашето малечко хидрирано. Иако изгледа како сосема разумна работа, научниците дури неодамна се заинтересираа да разберат како всушност функционира овој феномен.
Истражувањата покажаа дека медот е одличен природен лек за ублажување на кашлицата, без разлика за каков тип на кашлица се работи. Сепак, педијатрите предупредуваат дека е подобро да се избегнува мед кај деца под една година. Медот може да се примени еднократно, а најдобро е тоа да биде пред спиење. Дајте му половина чајна лажичка на дете од една до пет години и една кафена лажичка на деца од шест до 11 години
Истражувачите од Универзитетот во Кардиф откриле дека топлите пијалоци се особено ефикасни во ублажувањето на симптомите на настинка и грип. Во нивната студија тие забележале дека топлите пијалоци ги ублажуваат симптомите на течење на носот, кашлица, кивање, болки во грлото, треска и замор.
- Навлажнувач на воздух
Сувиот воздух во загреаните простории е многу чест во есенските и зимските месеци, а дополнително го суши и онака надразнетото грло на децата. Затоа се препорачува употреба на навлажнувач во детската соба, како и редовно проветрување на просторијата каде што престојува детето.
- Спиење на повисоко
Ако вашето дете страда од кашлица која е особено изразена во ноќните часови, тоа секако му го нарушува сонот. Токму затоа лекарите препорачуваат детето да спие во подигната положба за слузта од носот да не тече во грлото, а потоа во белите дробови. Подигнете ја главата на детето навечер – така ќе му ги отворите дишните патишта за слузта насобрана во задниот дел на грлото да не тече понатаму, советуваат педијатрите.
