Гласното ‘рчење кај децата е вообичаено и не е причина за загриженост доколку се случува само повремено, но ако се јавува повеќе пати неделно, може да биде симптом за апнеа.
‘Рчењето три или повеќе ноќи неделно, велат педијатрите, особено во комбинација со одредени други форми на однесување, може да биде симптом за опструктивна апнеа во сон, потенцијално сериозно нарушување во кое дишните патишта делумно или целосно се блокираат во текот на спиењето – и дишењето престанува.
Околу едно од четири деца понекогаш ‘рчи, според Професионалното здружение на педијатри со седиште во Келн (БВКЈ). “Рчењето предизвикано од запушени дишни патишта и проследено со кратки паузи во дишењето, меѓутоа, може да доведе до здравствени проблеми како висок крвен притисок кај возрасните и децата.
Студиите сугерираат дека нарушувањето на спиењето може негативно да влијае на кардиоваскуларниот систем, имуниот систем, метаболизмот и расположението, истакнуваат од БВКЈ.
Кога нивото на кислород во крвта ќе падне, телото ја буди личноста за повторно да почне дишењето. Иако повторувањата на будењето се куси и сонот веднаш продолжува, клучната фаза на спиењето позната како РЕМ фаза е потисната и оневозможен е мирен и длабок сон.
Состојби поради кои децата се особено подложни на апнеа вклучуваат алергиски ринитис, респираторни нарушувања, слаб мускулен тонус, зголемени крајници и аденоиди, назални полипи, обезност, расцеп на усната и непцата, како и трисомија 21, позната како Даунов синдром.
Изложеноста на загадувачи или чад од цигари исто така е ризик фактор, напоменува педијатарот и стручњак од БВКЈ, Херман Џозеф Кал.
Апнеата во сон најчесто се јавува кај децата на возраст од 2 до 8 години бидејќи тогаш брзо им растат крајниците и аденоидите, објаснуваат педијатрите. Најчести причини за состојбата, велат, се зголемени крајници и аденоиди (големи во однос на детските дишни патишта) или носни полипи.
Освен ‘рчењето најмалку три ноќи неделно, можни симптоми за апнеа во сон вклучуваат потешкотии со дишењето во текот на спиењето, дишењето на уста во текот на спиење, утрински главоболки и поспаност во текот на денот, вели д-р Кал.
Родителите треба да го одведат своето дете на лекар доколку забележат дека детето често ‘рчи, дека е многу уморно во текот на денот и/или има проблеми со однесувањето или во училиште.
