Една од најчестите причини за појава на болка во колковите кај децата е акутното воспаление на внатрешната обвивка на колкот (синовија) при која се собира поголема количина на зглобна течност. Ваквата појава доведува до зголемен притисок во колковите и настанува болка. Вообичаено се јавува на возраст од 3-10 години, и е за два пати почеста кај момчињата, во споредба со девојчињата. Но, станува збор за минлива состојба која не остава никакви последици.
МОЖНИ ПРИЧИНИ
Причините за акутното воспаление на колкот кај децата не се познати, но се претпоставува дека се работи за вирусно воспаление бидејќи често се јавува по претходна фебрилна состојба, инфекција на горно респираторните патишта, бронхит или пневмонија (воспаление на белите дробови). Можно е ова заболување да се јави и по примена вакцина, а причина може да биде и претходна повреда на детето.
СИМПТОМИ
Болеста се манифестира со нагла болка во колкот, но има случаи кога децата се жалат на болки во натколеницата или во коленото. Некои деца поради болките не сакаат да застанат на нозе и да одат, најчесто откако ке станат од спиење. Децата криват кога одат или ногата ја виткаат во колкот и коленото, отворена кон надвор, позиција во која притисокот на колкот е најмал. Ако на состојбата и претходела инфекција на дишните патишта или увото може да се јави и мала тепература до 37,5 степени.
Кога ќе се забележат вакви тегоби детето веднаш треба да се однесе на преглед кај специјалист. Се препорачува да се направи анализа на крвта со цел да се исклучи бактериското воспаление или ревматско заболување. Прегледот кај специјалист вклучува и ехо на колкот со цел да се види во каква состојбата е обвивката на колкот и количината на изливот во колкот.
За да се исклучат други посериозни состојби на колкот и карлицата се прави рендген снимка која се повторува по шест месеци. Целта е да се исклучи Пертесовата болест на колкот при која доаѓа до трошење на главата на бутната коска поради нарушено снадбување со крв на истата. Се претпоставува дека повторувачките воспаленија можат да доведат до Пертесова болест заради повторувачкиот притисок врз главата на бутната коска. Понекогаш е потребно да се направи и магнетна резонанца на колкот.
КОГА Е НЕОПХОДНО ЛЕКУВАЊЕ
Ова заболување на колкот може да се повлече спонтано, без лекување, ако е во полесна форма. Основна препорака во лекувањето е мирувањето. Детето не смее да има интензивни физички активности, како трчање или скокање, со цел дополнително да не се оштетат воспалените делови на колкот. Се дава благо антивоспалително средство кое ќе го смири воспалението, отокот и болката. Антибиотик се дава по оценка на лекарот, после прегледот и направените иследувања, за да се излекува предходно бактериско воспаление и да се превенира бактериска суперинфекција. Контрола кај детето се прави по 3 – 5 дена од првите симптоми.
Доколку детето добие висока температура и влошување на симптомите треба веднаш да јавите на лекар. Вообичаено симптомите се повлекуваат по 2 – 3 дена од почетокот на лекувањето, иако изливот во колкот може да биде присутен 7-10 дена, па затоа и лекувањето се продолжува во тој период, а по потреба и подолго. Контролите се прават додека потполно не исчезнат симптомите. Компликации од оваа болест се многу ретки. Пертесовата болест се јавува кај 1- 3% од децата што имаат транзиторни синовиити.
Акутното воспаление на колкот може повторно да се јави, најчесто кај малите деца, во период од 6 месеци од предходното воспаление. Ова се случуваат кај 4 – 17 % од децата. Излекувањето од оваа болест е целосно и најчесто без последици по колкот на детето.
