Ако вашето дете ги гризе ноктите, можеби сте загрижени дека на овој начин ќе внесе нечистотија и микроорганизми или едноставно не сакате да има грда навика која ќе го расипе и изгледот на прстите. За дете кое гризе нокти има неколку решенија препорачани од педијатри.
„Децата ставаат се и сешто во устата, вклучително и прстите, па може да се разболат од внесените микроорганизми. Можни се бактериски инфекции на кожата околу ноктите, но и други микроорганизми можат да предизвикаат проблеми. Децата кои ги грицкаат ноктите исто така можат да направат трајно оштетување на ноктите и прстите“, вели педијатарот д-р Синди Гелнер.
Еве како детето да престане да ги грицка ноктите, во зависност од возраста.
- Исечете ги ноктите
Ако нема должина, детето нема што да грицка. Покрај тоа, ноктите нема да се закачуваат на ткаенините на облеката или предметите, па нема да има остри рабови кои ќе „мамат“ на грицкање.
- Не правете „драма“
Децата сакаат да контрираат, па ако правите драма околу грицкањето нокти, можеби тоа го прават само за да предизвикаат реакција кај вас. Не правете големо прашање околу тоа, бидејќи темата за грицкање нокти ќе му биде се поинтересна на детето, колку поголема е реакцијата што ја забележува.
- Што кога мало дете грицка нокти?
Ако дете на возраст до три години ги гризе ноктите, најдобрата тактика е да му го свртите вниманието на нешто друго. Држете ги рацете на вашето дете зафатени и кога ќе забележите грицкање, направете една од овие работи.
- Побарајте од детето да земе некој предмет или да го подигне
- Дајте му играчка со која ќе може да се забавува
- Направете игра од тоа, замолете го детето да направи некоја активност што не може да ја прави додека ги грицка ноктите, на пример да ракоплеска.
Психологија
Кај помалите деца кои грицкаат нокти, воведете систем за наградување со налепници. Поставете временска рамка, а ако детето не ги гризе ноктите, пофалете го и дајте му налепница. Кога ќе „собере“ пет налепници, направете заедно нешто забавно што му се допаѓа, како одење во парк.
Со постарите деца можете да пробате необичен трик. Кажете му на детето дека е дозволено да ги грицка ноктите, ако пред тоа направи нешто што вообичаено не му се допаѓа – средување на собата, да ги однесе играчките на некое место или слично. Оваа техника дава резултати кај постарите деца, бидејќи набрзо им здосадува активноста која претходи на грицкањето нокти, а големи се шансите да се откажат од оваа грда навика за да не се занимаваат со првата обврска.
Обидете се да набљудувате дали детето ги гризе ноктите само во одредени ситуации. Додека е во одредена просторија, во друштво со одредена личност, додека гледа одреден цртан или слуша одредена песна… Можно е нешто од околината да предизвика стрес, што потоа предизвикува грицкање нокти. Ако го забележите ова, разговарајте со детето и пробајте еден од триковите споменати погоре.
