Сигурни сме дека не постои родител кој не стравува од можноста детето случајно да го фати додека води љубов со партнерот. Сепак, колку и да е непријатна и збунувачка оваа ситуација, постојат едноставни решенија како правилно да се реагира согласно возраста на детето. Имено, експертите предупредуваат дека најголемата грешка што можете да ја направите во таква ситуација е да го игнорирате она што се случило.
„Наместо да врескате, избезумено да барате облека или брзо да трчате во купатилото, обидете се да останете смирени. Така нема да го исплашите детето со вашите непромислени реакции. Прашајте го смирено дали му треба нешто или само објаснете му со смирен тон дека на мама и тато им треба малку време за себе и дека не треба да се плаши. Ова многу ќе помогне во спречување на стравот и анксиозноста кај детето“, советува клиничкиот психолог Аза Браун за порталот „Essential Mums“.
Таа додава дека правилните одговори на оваа непријатна ситуација многу зависат и од самата возраст на детето. Имено, дете од две години нема да разбере што точно се случува, за разлика од дете кое веќе тргнало на училиште. Затоа, важно е да разговарате со вашето дете на начин на кој може да го разбере.
Наместо да врескате, избезумено да барате облека или брзо да трчате во купатилото, обидете се да останете смирени. Така нема да го исплашите детето со вашите непромислени реакции. Прашајте го смирено дали му треба нешто или само објаснете му со смирен тон дека на мама и тато им треба малку време за себе и дека не треба да се плаши
Бебе
Кога станува збор за малите бебиња, родителите честопати стравуваат дека она што го виделе кај нивното малечко може да остави последици или да предизвика траума. Тоа, објаснува психотерапевтот, воопшто не е точно.
„Многу семејства спијат во кревет со своите бебиња или креветчето на бебето е во нивната спална соба. Нема ништо штетно родителите да искажуваат љубов во близина на бебето додека тоа спие или е покрај нив, но зафатено со некои други работи. Бебињата не можат да разберат што всушност прават нивните родители, па затоа не им е ни важно“, објаснува психотерапевтката Џенифер Напарстек Клајн.
Дете кое оди во градинка
За разлика од бебињата, кои во повеќето случаи нема да го разберат ниту ќе реагираат на она што го гледаат, децата од градинка може да се исплашат поради звуците што ги слушаат, па мора да ги уверите дека се е во ред и дека ништо лошо не се случува.
Експертите советуваат дека не е добро да се лаже, туку сосема е доволно да им се објасни дека мама и тато се гушкале на посебен начин, како што, на пример, се гушкаат само возрасните кои се заљубени. Кажете дека никој не е повреден и застанете на тоа, доколку детето нема дополнителни прашања.
Дете на училишна возраст
На оваа возраст детето е веќе свесно за се околу него, но и љубопитно, па можете да очекувате многу прашања за непријатната ситуација во која сте се нашле. Како што пренесува порталот „Parenting“, важно е да се земат предвид чувствата на детето при секое објаснување.
Имено, доколку видите дека е видно вознемирено или му е непријатно да зборува за она што го видело, почекајте да се смири или пренасочите му го вниманието на нешто друго. Исто така, експертите веруваат дека оваа возраст е вистинско време да го научите вашето дете да ги почитува туѓите граници и приватност.
