Во текот на првата недела од новата година, грипот се рашири низ целата земја, при што децата се меѓу најпогодените, покажуваат податоците од Институтот за јавно здравје на РСМ. Во однос на возрасната дистрибуција, 749 лица се на возраст од 15-64 години, 618 – деца на возраст од 5-14 години, 229 – деца на возраст од 0-4 години и 129 се лица на возраст над 65 години. Највисока инциденца (287,7/100.000) се регистрира кај децата на возраст од 5-14 години.
„Се забележува значително зголемување на бројот и инциденцата на заболувања слични на грип на неделно ниво. Во текот на првата недела од 2026 година, за првпат во сезоната е регистрирана средна активност на грипот на национално ниво. Резултатите добиени од вирусолошкиот надзор над инфлуенца покажуваат дека има регионална географска активност на вирусот на грип. Процентот на позитивност е над границата од 10 % четири недели со ред. Согласно овие податоци, во Македонија има висок интензитет на вирусот на грип, со очекување на понатамошно зголемување на активноста во наредниот период“, се вели во епидемиолошкиот коментар на ИЈЗ.
Највисока инциденца (287,7/100.000) се регистрира кај децата на возраст од 5-14 години
Индикаторите за активноста на грипот продолжуваат да се зголемуваат низ Европскиот регион во последните две недели. Извештајот на ERVISS јасно покажува дека Европа се наоѓа во активна фаза на сезоната на грип, со истовремена циркулација на повеќе респираторни вируси. Процентот на позитивни примероци за грип во сентинел надзорот е највисок кај децата на возраст од 5-14 години. Децата се меѓу најпогодените од грип и RSV, додека најтешките исходи се забележуваат кај повозрасните лица. Ова ја нагласува важноста на превентивните мерки, раното препознавање на симптомите и заштитата на ранливите категории на население.
„Козле“ речиси со полн капацитет: до 250 деца дневно со симптоми на грип
Во Универзитетската клиника за респираторни заболувања кај децата „Козле“ дневно амбулантски се прегледуваат и до 250 деца, а околу 90 пациенти се хоспитализирани, поради што болничките капацитети се речиси целосно исполнети.
Како што информира директорката на Клиниката, проф. д-р Катерина Бошковска, хоспитализирани се деца со компликации од грип, како дехидратација, пневмонии и бронхоопструкции, при што дел од пациентите примаат и кислородна поддршка. Меѓу хоспитализираните има и доенчиња со RSV бронхиолитис. Според неа, грипот го достигнал својот пик во изминатата недела, а за наглиот пораст на заболени придонеле новогодишните и божиќните празници, кога децата масовно престојувале во затворени простории.
Лекарите апелираат децата со симптоми на грип да не се носат во градинка и при влошување на состојбата навремено да се побара лекарска помош.
ОПШТИ МЕРКИ ЗА ПРЕВЕНЦИЈА ОД ГРИП
Од ИЈЗ на РСМ потсетуваат дека општите мерки за заштита од грип важат и за сите други акутни респираторни инфекции и можат значително да помогнат во намалување на ризикот од заболување, особено ако се применуваат доследно во текот на целиот зимски период. Еве ги нивните препораки:
- Останете дома и не одете на работа, во училиште или на места каде што има многу луѓе.
- Одморајте се и земајте многу течности и лесна храна.
- Избегнувајте блиски контакти со лицата со кои живеете, не примајте посети додека сте болни.
- Покријте го носот и устата со шамивче при кашлање и кивање. По употреба, фрлете ги во корпа за отпадоци.
- Носете заштитна маска кога контактирате со своите блиски во домот, кога кашлате и кивате.
- Практикувајте често и темелно миење на раце со топла вода и сапун.
- Користете влажни марамчиња кои содржат алкохол или средство за дезинфекција на рацете.
- Избегнувајте допирање на очите, носот и устата со раце.
- Често проветрувајте ја просторијата каде престојувате додека сте болни.
- Одржувајте ја чиста вашата околина – предмети, површини со средства за хигиена на домот.
- Ако сте над 65 години или имате хронични заболувања, или доколку симптомите на болеста се влошуваат или траат повеќе денови – побарајте лекарска помош.
Вакцинацијата против сезонски грип е најефикасна заштита од ова заболување. Институтот за јавно здравје препорачува вакцинација на целото население, особено на лица кои припаѓаат на т.н. ризични групи (согласно препораките на СЗО):
👵 постарите лица (над 65 години),
👶 деца на возраст од 6–59 месеци,
❤️🩹 лица постари од 6 месеци со хронични болести,
🤰 бремени жени,
🩺 здравствени работници.
Заклучно со првата недела, во Македонија, вакцинирани се вкупно 78.931 лица со бесплатна или комерцијална вакцина.
