Ретки денес се сметаат за среќни. Нивото на среќа опаѓа кај оние помлади од 30 години, според овогодинешниот Светски извештај за среќа. Експертите за тоа го обвинуваат растењето за време на пандемијата Ковид-19, поларизираната политичка сцена и климатските промени.
Во својата нова книга „Анксиозна генерација“ (The Anxious Generation: How the Great Rewiring of Childhood Is Causing an Epidemic of Mental Illness), авторот и психолог Џонатан Хајд укажува на уште еден виновник – паметните телефони.
Тој вели дека децата кои имале пристап до социјални медиуми и паметни телефони во основно и средно училиште пријавуваат повисоки нивоа на анксиозност и депресија.
„Најголемите ефекти на социјалните мрежи се случија за време на пубертетот, особено раниот пубертет. Се чини дека најголемата штета има кај возрасната група од 9 до 15 години“, вели тој.
За спречување на насилството, анксиозноста и депресијата кај тинејџерите, Хајд препорачува четири работи:
- Забранете паметни телефони пред средно училиште; децата можат да користат само класични мобилни телефони
- Нема социјални мрежи пред 16 години
- Забранете ја употребата на телефони во училиштата
- Овозможете им на децата повеќе слободна игра и независност, вклучително и поквалитетен одмор.
„Родителот може да има контрола кога да му даде телефон на своето дете или да му дозволи пристап до Инстаграм, но некои од структурните промени, како што се ослободувањето на училиштата од телефоните и давање приоритет на одморите, не можат да се спроведат толку брзо“, свесен е психологот.
Се истакнува дека паметните телефони го зголемуваат ризикот од изолација и исклучување од општеството, што негативно влијае на менталното здравје.
