♦♦♦♦♦♦♦
Децата остануваат дома – коронавирусот ги затвори градинките и училиштата во наредните 14 дена. За спроведување на оваа мерка еден од родителите на децата до 10 години, што ќе бидат ослободени од обврската да одат во градинките или да ја следат наставата, ќе бидат ослободени и од обврската да ги извршуваат работните обврски.
Владата на РСМ на денешната 15-та редовна седница ја разгледа информацијата на Управувачкиот комитет за координација и управување во системот за управување со кризи за преземање дополнителни мерки и активности за превенција од ширење на коронавирусот по сугестија на Комисијата за заразни болести на Министерството за здравство, и донесе заклучок да се заострат мерките и активностите за превенција од ширење на коронавирусот. Една од мерките е токму прекинување на воспитно – образовниот процес и наставата во сите детски градинки, основни и средни училишта и високо – образовни установи и во јавните научни институти на територијата на земјата во наредните 14 дена.
Се прекинуваат и сите воншколски или дополнителни програми како што се курсеви за странски јазици и слично.
