Љубовта на родителите треба да им обезбеди на децата чувство на сигурност, но што се случува кога родителот е емоционално нестабилен и непредвидлив? Во таквите семејства децата растат во постојан грч, прилагодувајќи се на расположението на родителот — никогаш не знаејќи дали ќе ги пречека топлина или гнев.
На социјалните мрежи се почесто се појавуваат видеа и сведоштва за ова искуство, а корисниците го користат терминот „eggshell mom“ – мајка покрај која се оди „како по јајца“. Во тие објави луѓето раскажуваат за мајки кои биле емоционално нестабилни, склони на изливи и навреди, создавајќи кај децата анксиозност и чувство на несигурност.
Психолозите предупредуваат дека ваквото однесување остава длабоки последици.
Иако не се работи за физичко насилство, емоционалната нестабилност може да има подеднакво — па дури и посериозно — влијание врз детската психа. Ако сте пораснале постојано внимавајќи на тонот, зборовите и однесувањето во присуство на својата мајка, можно е да сте живееле со таков тип родител.
9 одлики на емоционално нестабилен родител
- Неможност за контрола на емоциите
Таквите мајки тешко се справуваат со секојдневниот стрес. Реагираат бурно дури и на ситници. Психологот Никол Лепера објаснува дека кај нив и најмал предизвик може да предизвика експлозија на бес, слично на однесување што често се среќава кај луѓе со нарцисоидно нарушување на личноста.
- Расположението во домот зависи од нив
Кога атмосферата во домот се менува во зависност од тоа каков ден има мајката, детето живее во емоционално нестабилна средина. Таквите деца учат постојано да го „читаат теренот“ за да избегнат конфликт, наместо слободно да ги изразат своите чувства.
- Ги користат зборовите како оружје
Непредвидливите мајки често навредуваат, понижуваат и потсмеваат, без да мислат на последиците. Недостигот на емпатија и импулсивното однесување оставаат длабоки емоционални рани кај детето.
- Не ги почитуваат границите
Споделуваат премногу информации или ги оптоваруваат децата со свои проблеми.
Тоа води кон појава позната како „парентификација“ – кога детето станува родител на сопствениот родител. Таквата улога може сериозно да го наруши емоционалниот развој.
- Никогаш не преземаат одговорност
Овие мајки речиси никогаш не признаваат грешка. Секогаш имаат оправдување за своето однесување, без разлика колку било штетно. Наместо извинување, тие обвинуваат други, ретко согледувајќи ја сопствената улога во конфликтите.
- Љубоморни се на своите деца
Колку и да звучи неверојатно, некои мајки чувствуваат завист кон сопствените деца — нивниот успех, среќа или самодоверба. Често ги понижуваат или се натпреваруваат со нив, доживувајќи ги како закана за сопствената контрола.
- Имаат силна потреба за контрола
Секој обид детето да ја покаже својата волја тие го гледаат како предизвик или закана. Кога нешто не оди по нивно, реагираат со бес, вина или емоционална уцена.
Децата што растат во такви услови често стануваат несигурни и повлечени, учејќи дека мора да ги потиснуваат своите желби за да избегнат расправија.
- Манипулираат и лажат
За нив целта ги оправдува средствата. Лага и манипулација стануваат секојдневие – начин да се постигне што се сака. Децата што растат во таква атмосфера често усвојуваат погрешна слика дека измамата е прифатлив начин за решавање проблеми.
- Уживаат во создавање немир
Некои емоционално нестабилни мајки предизвикуваат хаос намерно, бидејќи така се чувствуваат помоќно. Во нивно присуство сè станува непредвидливо, а мирот во домот речиси и не постои.
Емоционалната нестабилност на родителот остава длабоки траги врз менталното здравје на детето. Но, важно е да се знае дека постои начин овој циклус да се прекине.Ако се препознавате во некој од овие описи, сосема е во ред да побарате стручна помош и да започнете со работа на создавање поздрави модели на однесување — и кон себе, и кон своите деца.
