Дислексија е пореметување на учењето кое вклучува потешкотии во читањето поради проблеми со препознавањето на говорните звуци и учењето како тие се однесуваат на буквите и зборовите (декодирање). Исто така се нарекува и пореметување на читањето, а дислексијата е резултат на индивидуалните разлики во областите на мозокот кои го обработуваат јазикот.
Според клиниката Мајо, дислексијата не е последица на проблеми со интелигенцијата, слухот или видот. Повеќето деца со дислексија можат да успеат на училиште со туторство или специјална образовна програма. Важна улога игра и емоционалната поддршка. Иако не постои лек за дислексијата, раната проценка и интервенција резултираат со најдобар можен исход. Понекогаш дислексијата останува недијагностицирана со години и не се препознава се до возрасна доба, но никогаш не е доцна да се побара помош, велат експертите.
Тежината на дислексијата варира од дете до дете, но состојбата обично станува очигледна само кога детето ќе почне да чита
СИМПТОМИ НА ДИСЛЕКСИЈА КАЈ ДЕЦАТА
Иако знаците на дислексија може да биде тешко да се препознаат пред вашето дете да тргне на училиште, постојат некои рани предупредувачки знаци кои можат да укажуваат на овој проблем уште во најраната возраст на детето. Штом вашето малечко тргне на училиште, наставникот обично е првиот што ќе забележи дека нешто не е во ред.
Тежината на дислексијата варира од дете до дете, но состојбата обично станува очигледна само кога детето ќе почне да чита. Најраните симптоми кои укажуваат на тоа дека вашето дете може да има дислексија се:
- доцнење во говорот,
- проблеми со учењето нови зборови,
- потешкотии при изговарање зборови како што се менување на гласовите во зборови или мешање на зборови кои звучат слично,
- проблеми со помнењето или именувањето букви, бројки и бои,
- потешкотии со учењето детски песнички.
На училишна возраст, симптомите се нешто поочигледни и вклучуваат проблеми со читање, обработка и разбирање на она што се слуша, потешкотии во пронаоѓање на вистинските зборови или формулирање одговори на прашања, проблеми со меморијата, потешкотии при забележување (и повремено слушање) сличности и разлики во буквите или зборовите, неможност да се изговори непознат збор, тешкотии во правописот, трошење невообичаено долго време на задачи кои вклучуваат читање или пишување и избегнување активности кои вклучуваат читање.
