Родителството носи многу радости, но и моменти кога е тешко да се најде вистинскиот начин да се постават граници и да се разбере однесувањето на децата. “Децата понекогаш може да покажат однесувања што родителите тешко ги разбираат, што може да предизвика фрустрација. Но, комуникацијата е основа на здрав однос родител-дете. Родителите играат голема улога во тоа како детето учи да ги изразува и да се справува со своите емоции”, објаснува професорот Мет Батери.
Како да му помогнете на детето да изразува емоции?
Разговорот со детето за емоциите му помага да ги разбере и изрази на здрав начин. Батери ги советува родителите да внимаваат на реакциите на децата и да поставуваат прашања кои поттикнуваат рефлексија. На пример, ако детето покажува лутина, наместо веднаш да го прекорите, обидете се да го прашате: „Ми се чини дека си лут. Дали е тоа затоа што нешто ти се чинело неправедно?“ На овој начин детето учи да ги препознава сопствените чувства и да најде подобар начин да се справи со нив.
Родителскиот пристап полн со со разбирање носи подобри резултати
Иако методите како „тајм-аут“ (привремено отстранување од ситуацијата) се вообичаен начин на дисциплинирање, експертите истакнуваат дека позитивното родителство може да биде поефективно. Пофалбата за пожелно однесување често дава подобри резултати од казната.
„Давањето специфична пофалба, како: „Ти благодарам што ги собра играчките“, му помага на детето да се чувствува добро за себе“, објаснува Батери. „Преку таквите пофалби, децата доживуваат внатрешна награда – чувство на задоволство што направиле нешто добро“.
Рутината води до подобро однесување
Јасните правила и секојдневната рутина можат да го намалат стресот и да им обезбедат на децата чувство на сигурност.
„Подготвувањето на ранец или облека претходната вечер ги олеснува утрата, додека редовното време за спиење и ограничувањето на времето пред екранот поттикнуваат здрави навики“, вели Батери. Доследноста создава стабилна средина и им помага на децата да развијат организациски вештини. Трпението, комуникацијата и рутината се клучни за позитивна семејна средина.
