Како ќе биде планот на ова поле во земјава и дали оваа училишна година учениците ќе се вратат во клупите, а најмалите во градинките, ќе се знае по првомајските празници. Според последните информации од Владата, Комисијата за заразни болести, Министерството за здравство и стручното мислење на епидемиолозите ќе одлучат како евентуално ќе изгледа враќањето на децата во нормала. Родителите се загрижени како ќе изгледа враќањето во училиште и во градинка, особено во Скопје и во поголемите градови, каде бројот на деца во одделенија, односно во групи е пренатрупан.
И додека се чекаат новите одлуки, еве како враќањето во училиште и во градинка го спроведува Норвешка.
Насоките на министерот за образование на Норвешка, Гури Мелби, се да се избегнува на едно место да има повеќе деца. Во пракса, тоа значи да во градинките има максимално три деца на една воспитачка т.е. негувателка во групи на деца до три години, и по шест деца на една негувателка во групи на деца од три до шест години. Составот на групата може да се менува, но не повеќе од еднаш неделно.
Активностите во градинката може да бидат вообичаении, но по секој директен контакт со децата, вработените задолжително мора да измијат раце. Советувано е и да се намали бројот на играчки поради полесно чистење, а играчките не треба да се делат меѓу групите деца, без претходно чистење. Забрането е носење играчки од дома, и децата треба да бидат на отворени што е можно повеќе.
- Децата не смеат да делат храна и пијалаци, а вработените во градинката мораат да се држат на оддалеченост од најмалку еден метар од останатите возрасни лица.
- Сите возрасни кои работат во градинка, треба често и темелно да ги мијат рацете најмалку 20 секунди, пред да ги исушат со хартиени марамчиња за еднократна употреба.
- Секоја градинка треба да постави и плакат со објаснување на режимот на миење раце, како и да развијат рутина која ќе биде забавна за децата.
Норвешка ги отвори градинките на 20. април, а од понделник ги отвора и училниците за деца во одделенска настава.
Министерот Мелби советува децата да останат дома ако покажуваат дури и благи симптоми на респираторни болести, но насоките нагласуваат, дека децата и вработените со типични симптоми на алергија на трева и полен, како што се чешање на очите, кивање и течење нос, може да одат во градинка.
Ако со детето живее лице кое припаѓа на ризична група, во тој случај детето не треба да оди во градинка. Тоа се мисли на лица со хронична белодробна болест, како астма, постоа дијабетес, рак, кардиоваскуларни болести или висок крвен притисок. Дете кое живее или е во близок контакт со лице со потврдена инфекција на коронавирус, треба да биде во карантин и не смее да оди во училиште или во градинка. Родителите треба да избегнуваат и влез во објектот. Децата се среќаваат со персоналот на влезот, а родителите ги земаат на истото место каде и ги оставаат.
