Резултати од студија во која учествувале над 80.000 жени, покажуваат дека доењето може кај мајката да го намали ризикот од развој на мозочен удар подоцна во животот. Имено, жените кои доеле имале за 23% помал ризик од мозочен удар, по менопаузата.
Исто така, колку една жена подолго доела, толку нејзиниот ризик од мозочен удар бил помал. Според мислењето на стручњаците, доењето е еден од многуте фактори кои би можеле да помогнат во заштитата од мозочен удар.
Мозочниот удар е четврта водечка причина за смрт кај жените во САД на возраст од над 65 години. Познати начини за спречување на мозочен удар вклучуваат здрава исхрана, одржување здрава телесна тежина, редовно вежбање, непушење, ограничување на внес на алкохол и контрола на хроничните медицински состојби како висок крвен притисок и дијабетес.
