Научниците од Кралскиот колеџ во Лондон утврдиле дека мултиситемскиот воспалителен синдром (MIS-C) кај децата, кој се разликува од Кавасаки синдромот, има врска со заразата со SARS-CoV-2 вирусот кој ја предизвикува болеста КОВИД-19.
Симптомите на мултиситемскиот воспалителен синдром се осип, треска и болка во стомакот, а научниците велат дека кај возрасните по инфекцијата со SARS-CoV-2 вирусот се развива КОВИД-19, додека кај децата почесто се јавува овој синдром MIS-C.
Истражувачите веруваат дека станува збор за одложена реакција на имуниот систем на инфекцијата.
На почетокот, кога новиот коронавирус почна да се шири во светот, научниците мислеа дека кај станува збор за Кавасаки синдромот, чии симптоми се зголемена телесна температура, осип, појава на отоци…
Сега научниците утврдиле дека MIS-C има врска со претходна инфекција со вирусот SARS-CoV-2, а со студијата е утврдено дека дури 68 проценти од децата кои го имаат овој синдром, имале и антитела на коронавирусот, што потврдува дека во минатото биле инфицирани со него.
