Родителите сакаат нивните деца да бидат паметни и многу од нив навистина се трудат да влијаат на тоа колку што можат, а експертите одлучиле на некој начин да им помогнат во тоа.
Имено, невронаучниците од Универзитетот во Источна Финска анализирале 504 деца на возраст од шест до девет години во текот на две години и откриле дека децата кои поминуваат повеќе време во читање и играње тимски спортови имаат подобри мисловни вештини од оние кои се фокусираат на други активности, како слободна игра или за ненадгледувана употреба на компјутер.
Најдобри резултати се забележани кај децата кои комбинирале зголемена физичка активност и време поминато со книга, заедно со традиционалната нордиска исхрана, која вклучува внес на нискомасни млечни производи и намален внес на црвено месо или колбаси.
„Подобрениот квалитет на исхраната, организираните спортски активности и читањето се поврзани со понапредни когнитивни вештини“, заклучуваат невронаучниците.
Што се однесува до делот од студијата што сугерира дека структурираната физичка активност, како што е организираниот спортски тренинг, може да ги подобри когнитивните вештини, наодот се надоврзува на претходните истражувања кои покажале јасна врска помеѓу зголемената физичка активност и подобрите функции на мозокот, вклучително и меморијата и способноста за учење.
Децата кои спортуваат често имаат поголема самодоверба, но и помали стапки на анксиозност и депресија од нивните врсници. Тимските спортови се особено корисни за менталната состојба на децата бидејќи ја мешаат физичката активност со социјалниот развој.
Сепак, експертите нагласуваат дека најдобро е децата да имаат здрава мешавина на структурирана и неструктурирана, односно слободна игра, бидејќи првата влијае на насоченото учење, додека втората ја поттикнува креативноста и самомотивацијата.
Што се однесува до фактот дека читањето за задоволство е поврзано со подобро ментално здравје, креативност и разбирање кај децата, како што беше претходно објавено по студија спроведена во Кембриџ, тоа не е многу изненадувачки. Претходните студии исто така покажале дека децата кои поминуваат повеќе време во читање отколку пред екрани имаат повеќе поени на когнитивните тестови.
