Инфицираните луѓе со британскиот сој се чини дека произведуваат повеќе вирус и ова може да резултира со пошироко распространета инфекција во телото, вели проф. Лоренс Јанг, вирусолог и професор по молекуларна онкологија на Универзитетот во Ворвик
♦♦♦♦♦♦♦
Луѓето кои се позитивни на тестот за новиот британски сој на коронавирус, се со поголема веројатност како симптоми на COVID-19 да пријават кашлање, болки во грлото или замор, додека помалку е веројатно дека ќе го изгубат чувството за вкус или мирис, покажа најновото британското истражување, пренесува „Ројтерс“.
Варијантата, идентификувана во југоисточна Англија во декември минатата година, се смета дека е попренослива, а исто така може да биде поврзана и со поголема смртност, иако податоците кои укажуваат на зголемена стапка на смртност се неизвесни и сè уште не се цврсти.
Британскиот завод за национална статистика (ONS) соопшти дека биле забележани разлики помеѓу варијантата од Велика Британија и другите кои ја предизвикуваат болеста COVID-19.
„Губењето на вкусот и губењето на мирисот беа значително поретки кај новата варијанта“, рекоа од ONS во анализата на карактеристиките на луѓето во Англија со COVID-19, опфаќајќи го периодот од 15 ноември 2020 година до 16 јануари 2021 година.
Варијантата на вирусот, идентификувана во југоисточна Англија во декември минатата година, се смета дека е попренослива, а исто така може да биде поврзана и со поголема смртност
„Другите симптоми беа почести кај позитивните компатибилни со новaта варијанта: кашлица, болки во грлото, замор, мијалгија (болка во мускулите) и треска“, истакнаат од ONS.
„Нема докази за разлика во гастроинтестиналните симптоми, отежнато дишење или главоболки“.
Истражувањето на ONS е една од најбитните мерки за преваленцата на COVID-19 и се користи за проценка на коронавирусните инфекции во заедницата.
Министерството за здравство вчера потврди дека при анализа на податоци од позитивни Ковид пациенти во месец јануари, во приватна лабораторија за генетика и персонализирана медицина во Скопје, кај еден примерок е детектирана мутација на британскиот сој на вирусот SARS-CoV-2. Станува збор за 46 годишен маж кој веќе е оздравен
Поголемо вирусно оптоварување
Проф. Лоренс Јанг, вирусолог и професор по молекуларна онкологија на Универзитетот во Ворвик, вели дека новата варијанта на вирусот има 23 промени во споредба со оригиналниот коронавирус од Вухан.
„Некои од овие промени во различни делови на вирусот може да влијаат на имунолошкиот одговор на организмот и исто така да влијаат на опсегот на симптоми поврзани со инфекцијата“, рече тој.
„Инфицираните луѓе се чини дека произведуваат повеќе вирус и ова може да резултира со пошироко распространета инфекција во телото и „можеби претставува повеќе кашлање, болка во мускулите и замор“, додаде проф. Јанг, а пренесува „Би-Би-Си“.
Пристигна и кај нас: Британскиот сој на вирусот детектиран во приватна лабораторија во Скопје
Министерството за здравство вчера потврди дека при анализа на податоци од позитивни Ковид пациенти во месец јануари, во приватна лабораторија за генетика и персонализирана медицина, кај еден примерок е детектирана мутација на британскиот сој на вирусот SARS-CoV-2. Станува збор за 46 годишен маж кој веќе е оздравен.
Според информациите од ИЈЗ, пациентот првпат на 29 декември 2020 година, поради покачена температура и отежнато дишење, направил брз тест, кој бил со позитивен резултат. По неколку дена, односно на 4 јануари 2021 година се јавил на преглед во приватната болница „Жан Митрев“ каде му е направен ПЦР тест кој бил позитивен, а пациентот веднаш бил хоспитализиран. На 15 јануари во болницата му е направен уште еден тест кој повторно е позитивен, се вели во соопштението од МЗ.
Оттаму објаснуваат дека во епидемиолошката анкета пациентот немал пријавено контакти ниту пак навел дека патувал надвор од државата.
