Резултати од италијанска студија објавени вчера укажуваат на тоа дека ефикасен вентилациски систем во училиштата може да го намали преносот на КОВИД-19 за над 80 проценти.
Со експеримент споредена е стапката на заразност со коронавирус во 10.441 училница во дел од Италија. Се покажало дека инфекцијата со коронавирус била значајно помала во 316 училници кои имале механички системи за вентилација, при што бројот на случаи на инфекции бил помал кога вентилацискиот систем бил посилен.
Со апликациите кои гарантираат целосна замена на воздух во училницата два и пол пати на час, бројот на заразени е намален за 40 отсто.
Бројот на случаи на инфекции е намален за 66,8 отсто доколку се извршат четири промени на воздухот на час, односно 82,5 отсто кога се извршени пет промени на воздухот во еден час, покажала студијата.
Повеќето училишта во Италија немаат механички системи за вентилација. Наместо тоа, наставниците се обидуваат да ги држат прозорците отворени кога тоа го дозволуваат временските услови.
Кога во училниците би се инсталирале најефикасни системи за вентилација “би можело да преминеме од 250 случаи на инфекции на 100.000 ученици на стапка од 50 случаи на зараза на 100.000“, се наведува во истражувањето.
Експериментот бил спроведен помеѓу септември 2021 година и јануари 2022 година.
