Повеќето родители сакаат да изградат силен однос и отворена комуникација со своите тинејџери, а психологот Беки Кенеди споделува совет кој може да помогне во тоа. Неодамна на социјалните мрежи таа откри едно прашање кое родителите треба да им го постават на своите деца.
„Ова можете да го направите уште денес со вашиот тинејџер, трае помалку од 15 секунди и веднаш ќе го подобри вашиот однос“, потенцира таа.
Станува збор за ова едноставно прашање: „Што е едно нешто што можам да го направам за да се подобрам како твој родител?“
Кенеди објаснува дека ова им помага на децата да се чувствуваат видено и почитувано. Таа тврди дека дури и ако детето одговори нешто како „Дај ми по 500 евра секој ден“, тоа не е нужно лошо. Сепак, тоа не значи дека на децата треба да им даваме по 500 евра секој ден, вели психологот.
„Знам дека ние родителите се грижиме дека децата ќе кажат нешто смешно и можеби ќе помислиме дека ова било залудно, но не е“, вели Кенеди.
Таа ги советува родителите да бидат љубопитни, и повторно се навраќа на примерот со џепарлакот.
„Секој одговор што ви го дава детето е информација. Ако сака 500 евра секој ден, можете да го прашаш за што му требаат толку пари, на што би ги потрошило и слично“, објаснува таа и нагласува дека љубопитноста е клучна.
„Со поставувањето на ова прашање ќе запознаете нов дел од вашето дете“, заклучува психологот.
