Опасноста од згрутчување на крвта кај луѓето заболени со Ковид-19 е далеку поголема отколку кај вакцинираните против оваа болест, вели водечкиот словенечки епидемиолог Матеја Логар, кој го предводи стручниот совет на словенечката влада.
Додека со следење на вакцинираните лица е утврдено дека ризикот од згрутчување на крвта што може да предизвика венска тромбоза или белодробна емболија кај вакцината на АстраЗенека е многу мал, односно еден случај на милион вакцинирани, во Словенија сериозни тромбоемболиски компликации се јавуваат кај околу една четвртина од пациентите кои се лекуваат од Ковид-19 во единиците за интензивна нега на словенечките болници, рече Матеја Логар. Таа на прес-конференција одговори на прашање во врска со недовербата создадена во јавноста во врска со вакцината на британско-шведската компанија, поради што дел од купените вакцини сè уште остануваат неискористени.
Тоа значи дека околу 40 пациенти со Ковид-19 од вкупно 157 кои се моментално на интензивна нега во словенечките болници можат да сметаат на тој ризик, објасни Логар пред новинарите.
Словенечкиот епидемиолог смета дека од самиот почеток на промоцијата на АстраЗенека се направени голем број пропусти во комуникацијата со јавноста, иако Европската агенција за лекови ја прогласи вакцината за безбедна и ефикасна.
Според последните податоци, досега се вакцинирани 17,7 проценти од населението во Словенија. Повеќе од половина од возрасната група од 60-70 години се очекува да бидат вакцинирани во првите денови од оваа недела, откако веќе повеќе од половина од популацијата над 70 години е вакцинирана.
