Децата ги учиме дека на лагата и се кратки нозете и се трудиме од мали да ги воспитуваме секогаш да ја кажуваат вистината. Сепак, малите деца обично имаат фаза во растењето кога сепак се обидуваат да ги излажат мама и тато, а потоа родителите се загрижени бидејќи не се сигурни како да постапат.
За почеток, можеби нема да треба премногу да се грижите бидејќи лажењето на детето значи дека неговиот мозок добро се развива, барем така велат експертите.
Научниците од Универзитетот во Флорида анализирале 114 деца на возраст од седум до 11 години и им дале да направат тест. Иако од нив не било побарано да изневерат, им била дадена можност да го сторат тоа, а цело време биле следени преку скриени камери.
Изненадувачки, само една четвртина од децата ги погледнале одговорите и мамеле на тестот, а токму тие се покажале дека се попаметни и имаат подобро помнење на следните тестови.
Друга студија спроведена од Универзитетот во Торонто во која учествувале 1.200 деца, заклучила дека е нормално децата да лажат. Водечкиот автор на студијата, Канг Ли, го објаснува ова со фактот дека лажењето и криењето на лагите во долг временски период бара голем интелектуален напор.
Ако детето лаже, особено ако е под пет години, ги користи сите свои вештини, особено оние кои бараат самоконтрола.
Многу родители се загрижени дека детето кое лаже ќе порасне во лажго, но научниците истакнуваат дека ваквото однесување кај малите деца не значи дека тие ќе станат возрасни кои постојано ја кријат вистината. Лажењето во детството, посочуваат, не е ништо повеќе од нормална фаза во развојот од која не треба да се прави драма.
