Фарингитис е црвенило, болка и оток на грлото (фаринкс). Тонзилитис е воспаление на крајниците. Крајниците се пар маси од ткиво од двете страни на задниот дел на грлото. Тие се дел од имунолошкиот систем, делот од телото кој се бори против инфекции и други болести. Вашето дете може да има фарингитис, тонзилитис или двете истовремено (фаринготонзилитис).
Што предизвикува фарингитис и тонзилитис кај дете?
Фарингитисот може да биде предизвикан од многу нешта. Вирусните инфекции се најчестата причина. Тонзилитисот обично е резултат на вирусни или бактериски инфекции. Други причини вклучуваат:
- Бактерии, како оние што предизвикуваат стрептококна ангина.
- Габички, како оние што предизвикуваат габични инфекции (кандида).
- Алергии, како поленска треска или алергии што го зафаќаат носот.
- Инфекција на синусите.
- Канцери.
- Повреди.
- Иританти, како чад од цигари или загаден воздух.
- Желудочни киселини во грлото.
Кои деца се изложени на ризик од фарингитис и тонзилитис?
Вирусните и бактериските инфекции се шират преку близок контакт со други луѓе кои се болни. На пример, децата кои одат во училиште или градинка се изложени на ризик. Ова е особено точно во зимските месеци, кога се јавуваат повеќето вирусни и бактериски инфекции.
Кои се симптомите на фарингитис и тонзилитис кај дете?
Симптомите може да бидат малку поинакви кај секое дете. Тие можат да вклучуваат:
- Болно грло.
- Тешкотии или болно голтање.
- Зголемени, болни жлезди на вратот.
- Засипнатост или промена на гласот.
- Треска.
- Главоболка.
- Болка во увото.
- Вознемирен стомак (мачнина) и повраќање.
- Болка во стомакот.
- Чувство на болка во телото и замор.
- Црвено или отечено грло.
- Црвени или зголемени крајници.
- Грлото или крајниците може да имаат белузлав секрет.
- Проблеми со дишењето или ‘рчење.
Симптомите на фарингитис и тонзилитис може да бидат слични на други здравствени состојби. Погрижете се вашето дете да го прегледа лекар за точна дијагноза.
Како се дијагностицираат фарингитис и тонзилитис кај дете?
Лекарот на вашето дете ќе ве праша за моменталните симптоми. Ќе му ја измери температурата на детето и ќе изврши преглед, обрнувајќи посебно внимание на ушите, носот, грлото и крајниците. Во зависност од симптомите, може да направи брис од грлото или анализи на крвта.
Тонзилитисот може да бара и болничко лекување ако зголемените крајници ги блокираат дишните патишта. Кај некои деца со чести тонзилитиси, лекарот може да советува отстранување на крајниците (тонзилектомија). Во тој случај, веројатно ќе треба да посетите специјалист за уво, нос и грло (ОРЛ)
Вашето дете може да направи брз стреп-тест. Ова е брз тест за да се види дали детето има стрептококна ангина. Важно е да се провери за стрептокока за да се лекува правилно и да се спречат компликации. Може да се направи и култура од брис. За овие резултати се потребни неколку дена. Анализи на крвта може да се направат за да се проверат инфекции како мононуклеоза.
Како се лекуваат фарингитис и тонзилитис кај дете?
Лекувањето ќе зависи од симптомите на вашето дете, неговата возраст и општата здравствена состојба. Исто така, ќе зависи од тоа колку е тешка состојбата.
Ако вашето дете има бактериска инфекција, ќе се лекува со антибиотици. Ако бактериите не се причина за инфекцијата, тогаш третманот ќе се фокусира на тоа да му биде поудобно на детето. Третманот може да вклучува:
- Земање парацетамол или ибупрофен за болка. Разговарајте со лекар пред да дадете каков било лек на дете.
- Зголемување на внесот на течности. Некои чаеви имаат состојки кои го смируваат грлото.
- Консумирање на мека, ладна храна како желатин, сладолед и овошни лижавчиња.
- Гаргара со солена вода (за постари деца).
- Шмукање пастили за грло или тврди бонбони (за постари деца).
Тонзилитисот може да бара и болничко лекување ако зголемените крајници ги блокираат дишните патишта. Кај некои деца со чести тонзилитиси, лекарот може да советува отстранување на крајниците (тонзилектомија). Во тој случај, веројатно ќе треба да посетите специјалист за уво, нос и грло (ОРЛ).
Како можам да помогнам во спречување на фарингитис и тонзилитис кај моето дете?
За да му помогнете на вашето дете да не се разболи:
- Научете го на добра хигиена на рацете.
- Чувајте го подалеку од луѓе кои имаат болки во грлото, настинки или други инфекции на дишните патишта.
- Не пушете. Чувајте го вашето дете подалеку од пасивно пушење.
- Редовно вакцинирајте го детето според Календарот за имунизација.
Кои се можните компликации од фарингитис и тонзилитис кај дете?
Компликациите вклучуваат:
- Сериозни инфекции во пределот на грлото.
- Губење на течности (дехидрација) поради проблеми со јадење и пиење.
- Проблеми со дишењето поради многу големи крајници.
Нелекуваната стрептококна ангина може да доведе до проблеми со срцето и бубрезите, инфекција на средното уво, инфекција на белите дробови или воспаление на мозочните обвивки (менингитис).
Кога треба да се јавам на лекар?
Јавете се на лекар ако:
- болката во грлото не поминува по неколку дена.
- болното грло е придружено со други симптоми, како што е покачена температура.
Повикајте 194 (Брза помош) ако вашето дете има:
- тешкотии со дишењето.
- силна болка во грлото и тешкотии со голтањето или дишењето, се лигави или има вкочанет врат или оток на вратот. (Johns Hopkins Medicine)
