По доаѓањето од родилиште дома, бебето е мирно и спие, но две недели подоцна почнувате да доживувате вистински пекол. Бебето има фази на плачење кои вие не можете да ги смирите ниту со една вам позната метода. Напротив, што и да направите, ви се чини дека бебето како уште повеќе да плаче.
Англискиот термин PURPLE crying го измислил педијатарот Роналд Бар, кој, мотивиран од прашањата на многу загрижени родители, спровел илјадници истражувања за бебшкиот плач.
Така, тој дефинирал фаза во развојот на бебето која е проследена со речиси хистерично плачење, кое може да трае и до 5 часа и е т.н. ‘неуништливо’ додека, од некоја непозната причина, не престане.
На македонски, овој термин ќе го наречеме фаза на виолетово плачење или виолетов плач, иако терминот е осмислен како англиски акроним, а секоја буква има одредено значење што го објаснува овој феномен.
- Плачењето го достигнува својот пик околу 2. месец од животот
Периодот на виолетово плачење започнува на возраст од околу 2 недели и продолжува до приближно 3-4 месечна возраст. Иако сите бебиња минуваат низ овој период на развој, некои се едноставно неутешни и не можете со ништо да ги смирите.
- Започнува во исто време од денот, без причина
Бебето еден дел од денот е расположено, нормално јаде,спие, а како што се приближува доцна попладне или вечер, влегува во фаза на интензивно плачење. Плачењето секогаш започнува во исто време од денот и може да трае до 5 часа во континуитет.
- Бебето има болни изрази и виолетова боја на лицето
Во текот на плачењето, бебето прави болни гримаси на лицето, па многу родители овој вид на плач го препишуваат на грчеви или колики, но тие воопшто не мора да бидат причината. Исто така, бојата на лицето на бебето станува благо виолетова, поради напорот.
- Се спротивставува на секаков вид на смирување
Иако некои смирувачки методи се доста ефикасни кај вообичаеното плачење и нервоза, кога ќе се појави фазата на виолетово плачење, се чини дека ништо веќе не помага. Уште полошо, ви се чини дека секој ваш обид да го смирите бебето поттикнува уште поинтензивен и погласен плач.
- Се работи само за период
Иако фазата на виолетово плачење е фрустрирачка и едвај поднослива за родителите, станува збор едноставно за фаза во развојот која е минлива, во рок од еден месец.
