Има нешто прекрасно и тажно во свесноста дека вашето најмало дете воедно е последно, ако така сте одлучиле. Поинаку ги гледате, можеби поинаку и се однесувате, свесни дека веќе нема да слушнете нечиј прв збор, некого да доите или носите под срцето. Мајката Кари Вира Динен за списанието Parents ги опишува фазите низ кои поминала кога таа и нејзиниот сопруг одлучиле да немаат повеќе деца.
Радост
Официјално сте излегле од бебешките фази. Нема повеќе шишиња, крпчиња за подригнување, нема ниту мачнини во бременоста, трудови, компликации со доењето. Нема размислување за тоа што смеете или не смеете да јадете, хранење на бебето среде ноќ и комплетна ненаспаност. Сознанието дека една поинаква и послободна фаза настапила во вашиот живот ви носи голема радост.
Тага
Сè што ве прави особено среќни во овој период, во друг момент може многу да ве растажи. Затоа што навистина нема да има повеќе бремености, доење, шишиња и се што рационално не го сакате, но сепак ве потсетува на убавината на мајчинството. Дури и да е посакувана и цврста одлука, носи промена во животот и во ред е да тагуваме.
Љубопитност
Ќе видите мајка со повеќе деца на улица и можеби ќе се запрашате како би било да имате уште едно, што би се променило и како би изгледал вашиот живот. Дали тоа би влијаело на вашиот брак и дали навистина сте донеле конечна одлука.
Олеснување
Сфаќањето дека вашето семејство е комплетно носи чувство на големо задоволство и олеснување. Повторно можете да ја планирате иднината, семејните патувања, заштедите, кариерата и друго бидејќи знаете дека ново дете нема да ви го промени планот. Повторно чувствувате одредена контрола врз вашето тело, почнувате да се облекувате поинаку и изгледа како да се враќате на себеси.
Прифаќање
Не е секогаш лесно да се донесе оваа одлука и понекогаш се чини дека таа никогаш не е конечна. Сосема е нормално да чувствувате различни емоции во овој процес, но ако одлуката е правилна, на крајот постои чувство на мир и прифаќање дека тоа е одлука која е најдобра за вашето семејство.
