Развојот на бебето е комплексна работа, а родителите добиваат многу различни совети од сите – најмногу од оние кои не се стручни. Поради тоа понекогаш се збунети, па веќе не знаат ни кога детето треба да почне да седи, да лази, да оди, да зборува, кога треба да се воведува оваа или онаа храна…
Многу е важно мајките и татковците да добиваат совети поврзани со развојот на детето исклучиво од стручни лица, бидејќи некои погрешни чекори всушност можат да имаат негативно влијание врз неговиот развој.
Една од вообичаените забуни е, кога детето е подготвено за седечка положба и како родителите треба да почнат да го позиционираат да седи. Ако прашате некоја комшика, веројатно ќе ви каже „штом ќе наполни шест месеци, така јассо моите деца и што им фали“. Но, за да не ја слушате сосетката, за седнување на децата објаснува физиотерапевтот Снежана Милановиќ за порталот Yumama.
„Дете со уреден развој до седечка положба доаѓа само кога е невролошки и моторички подготвено за тоа. Секое поставување во пасивна седечка положба пред тоа, доведува до несоодветно оптоварување на ‘рбетниот столб, меѓупршленскиот простор се намалува, мускулите на грбот се издолжуваат, грбот станува свиткан, што на крајот ќе се претвори во деформитет на ‘рбетот – кифоза, која ќе се манифестира на подоцнежна возраст“, вели таа.
На прашањето дали е добро родителите на почетокот да ставаат перница зад грбот на детето, бидејќи тоа е практика која многу често може да се забележи, таа вели:
„Ставањето перница зад грб привидно овозможува седечка положба во која детето ја држи главата свиткана и нозете широко раздвоени, а рацете настрана за да одржува рамнотежа. Тоа не може да држи играчка со рацете или пасивно да ја држи без можност за манипулирање со неа, што негативно влијае на развојната функција на рацете“.
На крајот физиотерапевтот напоменува уште една последица од предвременото седнување, која подоцна тешко се коригира.
„Уште една последица од прераното седнување е подоцна седењето во положба W, што е неправилно и многу тешко децата го коригираат. Додека детето самостојно не дојде во седечка положба, детето не смее да седи освен кога е во хранилката додека јаде, со потпирач за грб накосен под агол“, заклучува таа.
