♦♦♦♦♦♦♦
Фотографии кои ќе ви го распараат срцето прикажуваат осуммесечно бебе чија кожа станала светло црвена откако било хоспитализирано со болест слична на Кавасаки поврзана со коронавирус.
Загрижената мајка Ел Адамс, од Манчестер, се јавила на 111 откако нејзиното бебе Луис, добило осип на образите, кој подоцна се раширил по целото тело. Фотографиите го прикажуваат бебето во болница откако неговата кожа станала светло црвена и отечена од воспалителниот синдром поврзан со коронавирус.
Луис поминал неколку инвазивни третмани во детската болница „Royal Manchester Children’s Hospital“, откако неговите усни станале толку отечени што почнале да крвават.
Луис, „нормално, среќно, здраво, лукаво момченце“, за првпат развил треска минатата недела. Тој станал „раздразлив“, губејќи интерес за храна и млеко и до понеделник развил osip на образите. До вечерта осипот се раширил по целото тело.
Неговата мајка Ел Адамс, учителка на породилно отсуство, слушнала за воспалителната болест слична на Кавасаки, „пост-Ковид-19 воспалителен синдром“. Состојбата главно ги погодува децата под пет години и се смета дека е одложена имунолошка реакција на коронавирус.
Луис бил тестиран за коронавирус, стандардна процедура за децата кои одат во болница, а резултатот се вратил негативен. Потоа бил преместен во просторија за набљудување, осипот се влошувал, a делови од неговото тело станале „светло црвени и отечени“. До средата неговото цело тело станало светло црвено и тој „изгледал како да бил цел ден на сонце“.
Тестовите покажале дека Луис има „навистина високи маркери“ за воспаление, за што докторите верувале дека може да биде пост-Ковид-19 имунолошки одговор.
Луис бил префрлен во „Royal Manchester Children’s Hospital“. Тестовите на крвта, осипот и треската, укажувале на знаци дека Луис страда од болест слична на Кавасаки.
Друг тест исто така покажал дека Луис има антитела за коронавирус и медицинските лица почнале да го следат неговото срце, бидејќи состојбата може да предизвика срцев удар.
Ел изјави: „Ова е причината зошто е толку застрашувачко. Тоа се работи што не можете да видите дека се случуваат“.
За среќа срцето немало никаква штета.
Во текот на саботата, осипот на нозете и рацете се смирил. Луис е се уште во болница, но покажува знаци на подобрување.
Со објавување на фотографиите и приказната Ел апелира до сите родители кои се сомневаат, имаат дилема за осип или болест да се јават на доктор.
„Мислам дека ги познавате сопствените деца, но ако не се добро, бидете сигурни дека тоа ќе го забележите и само побарајте помош. Во болницата тоа веќе го виделе“, додава 40-годишната мајка. (Дејли мејл)
