Болките во стомакот не се реткост кај децата. Тие можат да бидат предизвикани од најразлични причини, од прејадување, преку потреба за празнење на цревата, до анксиозност или грижа за настан што го очекуваат.
Меѓутоа, понекогаш болката во стомакот може да укажува и на здравствен проблем, а гастроентерологот д-р Мега Мејта објаснува кога на детето му треба само хидратација и одмор, а кога треба да одите на лекар.
ПРИЧИНИ ЗА БОЛКА ВО СТОМАК КАЈ ДЕЦАТА
Најчестите причини за болки во стомакот кај децата може да бидат:
- Проблеми со варењето
- Инфекција или стомачен вирус
- Констипација/Запек
- Стрес или анксиозност
- Синдром на нервозни црева или функционална абдоминална болка
- Воспаление на слепо црево (болката е акутна и ненадејна)
Останати симптоми кои се јавуваат може да варираат во зависност од причината, па освен болка, може да се појават и грчеви во стомакот, дијареа, гасови, надуеност, гадење и повраќање.
Меѓутоа, една од најважните работи кога се во прашање болките во стомакот е – каде го боли детето, односно во кој дел од стомакот.
Болка околу папокот
Болката што се јавува во близина или околу папокот обично не е причина за загриженост.
“Децата често го тријат стомакот кога имаат болки и се жалат на општа болка околу папокот. Овој тип на болка најчесто е предизвикан од стрес или некоја храна што не му годела на детето”, вели д-р Мејта.
Ако детето се жали дека го боли стомакот околу папокот, најдобро е да легне и да се одмори, да проверите дали има потреба за голема нужда, понудете му чаша вода и да се обидете да му го одвлечете вниманието читајќи нешто или играјќи.
Болка во долниот десен дел на стомакот
Воспалението на слепо црево бара итна медицинска реакција, а се препознава по силна болка во долниот десен дел на стомакот. Ако детето ви се жали дека на ова место го боли стомакот, обрнете внимание на тоа дали има и симптоми како што се:
- Треска
- Мачнина
- Повраќање
- Потешкотии во испуштање на гасови
- Губење на апетит
- Запек
- Дијареа
Доколку се сомневате за воспаление на слепото црево, најдобро е веднаш да го однесете детето на лекар, за да избегнете да дојде до пукање на слепото црево.
Болка на левата страна на стомакот
Ако детето се жали на болка на левата страна на стомакот, причината може да биде запек, но и нешто посериозно, како што е панкреатитис.
Неговиот совет е да не се паничи, туку да се однесе детето на лекар за да се утврди точната причина за болката.
Болка во горниот дел на стомакот
Ако детето се жали на болки во горниот дел на стомакот, причината може да бидат проблеми со варењето. Знаци кои укажуваат на дигестивни проблеми:
- Болка во горниот дел на стомакот
- Гадење
- Надуеност
- Подригнување
- Жиговина
Во некои случаи, болката во горниот дел на стомакот може да укажува и на камен во жолчката. Оваа состојба е почеста кај возрасните отколку кај децата, но кај некои деца постои зголемен ризик од жолчни камења – кај обезните, децата со одредени болести како српеста анемија, оние со семејна историја на жолчни камења…
Како да му помогнете на детето
Болката во стомакот обично поминува сама по себе отакако детето ќе:
- Одмори
- Испразни цревата
- Испушти гасови
- Закрепне од стомачниот вирус
Не постои лек за болка во стомакот, но има некои работи кои можат да помогнат да се ублажи овој непријатен симптом:
- Погрижете се детето да пие доволно течности
- Понудете му парацетамол за ублажување на болката
- Користете топли облоги за да ги ублажите грчевите или болката
- Дајте му да јаде крекери или супа
- Ако има проблем со запек, дајте му лек за омекнување на столицата
- Дајте му пробиотик – може да помогне при дијареа
Кога треба да посетите лекар
Болката во стомакот обично не е причина за загриженост, но ако детето има и некои од следниве симптоми, задолжително посетете лекар за да ја утврдите причината:
- Честа констипација
- Болки во стомакот кои се појавуваат често, а не ја знаете причината
- Крв во столицата
- Дијареа
- Треска и кашлица
- Болка за време на мокрење
- Необјаснето губење на тежина
- Детето изгледа болно
- Болка која го буди детето од сон или влијае на неговиот секојдневен живот
- Жолтица
Ако, покрај стомачната болка, забележите некој од следниве симптоми кај вашето дете, побарајте итна медицинска помош:
- Силна болка во стомакот
- Губење на свеста, замор
- Потешкотии во дишењето
- Дехидрација
- Крв во повратената содржина или содржина која има зеленикава боја
