Педијатрите во Германија предупредија дека бебињата и малите деца не треба да се хранат вегански. Детскиот организам е исклучително чувствителен на недостаток на хранливи материи, соопшти Здружението на педијатри и лекари за адолесценти (BVKJ) од Северна Рајна-Вестфалија.
За добар физички раст и здрав развој на сите органи, а особено на мозокот, потребни се многу супстанции и тоа во доволни количини, објасни портпаролот на Здружението Аксел Гершлауер по повод 1 ноември, Светскиот ден на веганите, пренесува „дпа“.
Кај веганската исхрана, снабдувањето со протеини, одредени масни киселини, витамини, како и други елементи кои се внесуваат во трагови е критично. Дури и малите флуктуации и недоволно снабдување може да ги оштети органите на бебињата кои растат и се особено чувствителни, рече Гершлауер.
Доилките веганки мора да земаат витамин Б12 и редовно да прават анализа на крвта
Конкретно, „масовно и трајно“ можат да бидат загрозени невролошкиот развој и менталното здравје. Речиси 10 отсто од возрасните во Германија сега се вегетаријанци – тие не јадат месо и месни производи – или вегани, што значи дека не јадат какви било производи од животинско потекло како млеко или јајца, велат од Здружението.
Многу родители, исто така, ги хранат своите деца вегетаријански или вегански. Исхраната без месо за млади се смета за изводлива под одредени услови. Но, веганската исхрана не се препорачува за бебиња и мали деца.
На веганската исхрана и недостасуваат важни хранливи материи кои мора да се надополнат од друга храна. Тоа е можно само во ограничена мера преку природна храна. На пример, витаминот Б12 мора да биде надополнет со суплементи.
Ако постарите деца и младите се свесно вегани, заради благосостојбата на животните или екологијата, тоа е за пофалба. Според BVKJ, тогаш се потребни стручни совети и редовни анализи на крвта – затоа што треба да се обезбеди внес на сите важни хранливи материи.
Доилките веганки мора да земаат витамин Б12 и исто така редовно да прават анализа на крвта.
