ГЕСТАЦИСКИ ДИЈАБЕТЕС: Како се лекува покачениот шеќер во бременоста и како влијае на плодот?

Зголеменото ниво на шеќер во крвта во бременоста може да се јави кај одреден број на трудници. Зошто доаѓа до појава на оваа состојба, како се открива и како се лекува.

Зголемениот шеќер во крвта претставува се почеста појава кај луѓето. Лошата исхрана и животните навики се причина за појава на дијабетес, што може да влијае на различни сегменти на здравјето.

Доколку жената пред бременоста имала дијабетес, тоа може да го загрози плодот, но и самата трудница и затоа е важно проблемот да се лекува навреме.

Дијабетесот во бременоста може да биде ПРЕДГЕСТАЦИСКИ ( пред забременување) и ГЕСТАЦИСКИ ( кога прв пат ќе се појави за време на бременоста).

Предгестацискиот дијабетес пред зачнувањето и во текот на првиот месец од бременоста може да доведе до срцеви и невролошки промени кај плодот (вродени аномалии). Ризикот за спонтан абортус, во ваквка ситуација, е зголемен.

За да се спречат проблеми и за бремената жена да биде здрава, важно е да се следи состојбата пред бременоста и да се постигне добра гликорегулација пред самото забременување.

Гестацискиот дијабетес е минлива состојба и се јавува кај мал број трудници. Најчесто се јавува во периодот помеѓу 24. и 28. недела од бременоста. Во најголем број случаи, тој се дијагностицира со тест на оптоварување со глукоза (OGTT).

Зошто доаѓа до гестациски дијабетес?

Нормалните вредности на гликемијата за време на бременоста се:

  • пред оброј помалку од 5,3 mmol/L
  • еден час по оброк помалку од 7,8mmol/L
  • два часа по оброк помалку од 6,7mmol/L
  • како и HbA1c помал од 6%.

Гестацискиот дијабетес се јавува по хормонални и метаболички промени кои се јавуваат за време на бременоста, бидејќи тогаш засилено се лачи прогестерон, естроген, кортизол, пролактин и хуман плацентарен лактоген. Тие доведуваат до инсулинска резистенција, што спречува делување на инсулинот и внесување на шеќер од крвта во клетките.

Кога инсулинот не ја извршува својата функција, количината на шеќер во крвта се зголемува и се пренесува преку постелката до плодот. Зголемената глукоза во крвта на бебето доведува до поголем раст на феталните клетки и макросомија (зголемена телесна тежина на детето). Со самото тоа, доаѓа до поголеми комоликации за време на бременоста, на породувањето, но и по породувањето.

Како се лекува гестацискиот дијабетес?

Штом се утврди оваа дијагноза, важно е веднаш да се реагира.

Правилната исхрана во овој случај е од исклучителна важност. Избалансираната исхрана со намален внес на индустриски шеќери е важна, а трудницата мора да одржува оптимална телесна тежина.одреден број на мајки мора да примаат и инсулин.

Исто така, важно е редовно да се следи нивото на шеќер во крвта, бидејќи некогаш може да дојде до хипогликемија (пад на шеќерот), што потоа може да доведе до мала родилна тежина на бебето.

Што се случува со мајката по породувањето?

Кај жените кои имале гестациски дијабетес, по породувањето нивото на шеќер во крвта се нормализира.

Важно е по породувањето, редвно да се следи вредноста на шеќерот во крвта, а по 6-12 недели да се направи тест со оптоварување со глукоза.

Истражувањата покажуваат дека многу жени со гестациски дијабетес имаат склоност кон овој проблем подоцна, затоа е важно жената да одржува здрава телесна тежина, да се грижи за сопствената исхрана и здравиот начин на живот.