Шведската активистка Грета Тунберг во својот пост на социјалните мрежи објави дека е „многу веројатно“ дека била инфицирана со коронавирус.
На Инстаграм таа напиша дека во изминативе две недели била во изолација, откако се вратила од неодамнешната турнеја со воз низ Европа.
„Пред околу десетина дена почнав да чувствувам некои симптоми, во исто време со татко ми, кој исто така патуваше со мене од Брисел. Се чувствував уморно, се тресев, имав болки во грлото и кашлица. Татко ми ги имаше истите симптоми, но тие беа поинтензивни и имаше температура“, објави Грета.
Таа вели дека оздравела и се чувствува добро, но ги моли луѓето да размислат за своите постапки и да бидат одговорни. Во интервју за „New Scientist“ објаснува дека ниту она ниту нејзиниот татко не биле тестирани за коронавирус, бидејќи Шведска ги тестира само оние луѓе со најтешки симптоми, како и оние кои се во ризичните групи.
