Постојат многу различни состојби и болести на очите кои можат да влијаат на видот на детето. Ако вашиот педијатар се сомнева на одредена состојба или ако вашето дете не го помине скринингот за вид, докторот може да ве упати кај детски офталмолог за дополнителна евалуација и дијагноза.
Раното откривање и лекување се многу важни за да се избегнат доживотни оштетувања на видот. Подолу се наведени некои од најчестите нарушувања и болести на очите и начинот на кој тие се третираат.
Астигматизам
Неправилно обликувана рожница која може да предизвика заматен вид.
- Третман: Очила, доколку предизвикува заматен вид.
Затнат солзен канал
Кај бебиња со оваа состојба, наречена и опструкција на назолакрималниот канал, очите се преплавени со солзи и собираат слуз.
- Третман: Нежна масажа на солзниот канал може да помогне во отстранување на блокадата. Ако тоа не помогне, може да биде потребно сондирање или хируршка интервенција.
Катаракта (перде)
Заматување на очната леќа. Околу 3 на 10.000 деца имаат катаракта.
- Третман: Повеќето мора хируршки да се отстранат. Кај децата се ретки и обично не се поврзани со оние кај возрасните.
Халазион
Цврста, безболна грутка на очниот капак поради блокирана масна жлезда.
- Третман: Може да помине само по себе или со капки и топли облоги. Понекогаш е потребна помала интервенција.
Спуштени капаци (птоза)
Кога очните капаци не се отворени колку што треба. Ова е предизвикано од слабост во мускулот кој го отвора очниот капак.
- Третман: Ако е тешка форма, може да предизвика слаб вид (амблиопија) и потребна е операција.
Лажно вкрстени очи (псевдострабизам)
Предизвикано од широк носен корен или дополнителни набори кожа меѓу носот и окото. Очите само изгледаат како да се вкрстени.
- Третман: Нема. Очите треба само да се следат за да се осигурате дека се здрави.
Далековидост (хиперметропија)
Тешкотии со гледање предмети одблизу. Мал степен е нормален кај бебињата и децата.
- Третман: Ако стане сериозна или предизвика вкрстување на очите, потребни се очила.
Глауком
Состојба во која притисокот во окото е премногу висок. Предупредувачки знаци се екстремна чувствителност на светлина, солзење, постојана болка, зголемено око, заматена рожница и грчење на капакот.
- Третман: Кај децата обично е потребна операција. Нелекуван, може да предизвика слепило.
Мрзливо око (амблиопија)
Намален вид поради некористење на едното око. Често е предизвикано од лош фокус или кривење.
- Третман: Ставање прекривка (фластер) или капки на „доброто“ око. Исто така и носење очила или операција.
Вкрстени очи (страбизам)
Кога едното око бега навнатре, нагоре, надолу или нанадвор. Ова е предизвикано од очните мускули кои не работат добро заедно.
- Третман: Очила, фластери за око или операција, во зависност од причината.
Кратковидост (миопија)
Тешкотии со гледање на далечина. Почеста е кај децата на училишна возраст.
- Третман: Очила за корекција на видот на далечина. Децата обично не ја надраснуваат оваа состојба.
Конјунктивит
Црвенило на белката поради инфекција, алергија или иритација. Знаците вклучуваат солзење, исцедок и чувство дека има нешто во окото.
- Третман: Во зависност од причината, се третира со капки или маст за очи. Честото миење на рацете го ограничува ширењето на инфекцијата.
Гребнатинка на рожницата
Гребнатинка на предната површина на окото која може да биде многу болна. Очите обично солзат и се чувствителни на светлина.
- Третман: Антибиотски капки или маст за да се поттикне заздравувањето и да се спречи инфекција.
Јачмен
Болна црвена грутка на капакот поради инфицирана жлезда.
- Третман: Топли облоги и антибиотски капки или маст.
Воспаление на капаците (блефаритис)
Воспаление на масните жлезди на очниот капак. Ова обично предизвикува отечени капаци и создавање корички на трепките.
- Третман: Топли облоги и миење на капаците со бебешки шампон. Понекогаш се потребни антибиотици.
Забелешка: Американската академија за педијатрија (ААП) препорачува прегледи на очите за сите деца почнувајќи од периодот на новороденче и при секоја редовна контрола кај педијатар.
(Американска академија за педијатрија – ААП)
