Околу 169 милиони деца ја пропуштиле првата доза од вакцината против морбили во периодот меѓу 2010 и 2017 година, односно просечно 21,1 милион деца годишно, создавајќи пат за актуелната глобална епидемија, соопштија од УНИЦЕФ.
„Темелот за глобалната епидемија на морбили на која сме сведоци денес беше поставен пред неколку години“, изјави Хенриета Фор, извршен директор на УНИЦЕФ. „Вирусот на морбили секогаш ќе најде невакцинирани деца. Ако сакаме да бидеме сериозни и да го спречиме ширењето на оваа опасна, но спречлива болест, треба да го вакцинираме секое дете, како во богатите, така и во сиромашните земји“, додава првиот човек на УНИЦЕФ.
Во првите три месеци од 2019 година, пријавени се над 110.000 случаи на морбили во светот – што е речиси 300 отсто повеќе од истиот период лани. Се проценува дека 110.000 лица, од кои повеќето се деца, починале од морбили во 2017 година, пораст од 22 отсто во споредба со претходната година.
Две дози од вакцината против морбили се суштински за заштита на децата од оваа болест. Меѓутоа, поради немање пристап, слаб здравствен систем, попустливост, а во некои случаи, и поради страв или скептицизам во врска со вакцините, покриеноста во светот со првата доза од вакцината се пријавува на 85 проценти во 2017 г., бројка што остана релативно постојана во последнава деценија и покрај порастот на населението. Глобалната покриеност со втората доза е многу помала, со 67 проценти. Светската здравствена организација препорачува праг од 95 проценти покриеност со имунизација за да се постигне таканаречениот „колективен имунитет“, се вели во соопштението на УНИЦЕФ.
Две дози од вакцината против морбили се суштински за заштита на децата од оваа болест
Во врвот на листата на земји со висок приход каде повеќето деца не ја добиле првата доза од вакцината меѓу 2010 и 2017 година се наоѓа САД со над 2,5 милиони. По САД следат Франција и Велика Британија, со над 600.000 и 500.000 невакцинирани деца, соодветно, во текот на истиот период.
„Малите сипаници се премногу заразни“, истакнува Фор. „Пресудно е не само да се зголеми покриеноста, туку и да се одржи стапката на вакцинација со потребните дози за да се создаде сеопфатен имунитет за сите“.
Институт за јавно здравје:
Во земјава досега се регистрирани 1.175 случаи на мали сипаници
Според последните информации од Институтот за јавно здравје, вкупно, од почетокот на епидемијата во декември 2018 заклучно со 25.04.2019, во земјава се регистрирани 1.175 случаи на мали сипаници со стапка на заболување од 56,8 на 100.000 жители, што претставува највисок број на регистрирани случаи во последните 10 години.
Поради исполнување на епидемиолошките критериуми, епидемија од мали сипаници е прогласена на цела територија на Македонија. Подетално, според место на постојано живеење, случаи на мали сипаници се регистрирани во 21 град од Македонија, од нив 751 случај се од Скопје, Куманово – 109, Тетово – 99, Струга – 61, Кичево – 30, Гостивар – 27, Велес -25, , Гевгелија – 18, Дебар – 17, а во останатите градови се регистрираат по помалку од 10 случаи.
Најголем број на случаите се од возрасната група над 30 години – 504, а вкупната стапка на заболување кај оваа возрасна група изнесува 39,6 на 100.000 жители. Пријавени се 200 деца на возраст под една година каде што се регистрира стапка на заболување од 855,7 на 100.000 жители. Децата на возраст 1-4 години се регистрираат со 202 случаи и втора највисока стапка на заболување од 217,6 на 100.000 жители.
Според вакциналниот статус, 895 или 76,1% од заболени лица се невакцинирани, некомплетно вакцинирани или со непознат вакцинален статус. Од невакцинираните лица, 200 (17,0%) се на возраст под 12 месеци и не подлежат на вакцинација, согласно Календарот за имунизација.
Во Скопје од почетокот на епидемијата, вкупно се вакцинирани 12.848 деца до 14 –годишна возраст. Во останатиот дел од државата, вкупно се вакцинирани 8.320 деца до 14-годишна возраст со прва или втора доза.
Вкупниот број на вакцинирани лица на возраст до 14 години со МРП вакцина од почетокот на епидемијата во целата република изнесува 21.168, велат официјалните податоци на ИЈЗ Скопје. (К.Ш.Д.)
