Сосема е природно родителите да сакаат нивните деца секогаш да бидат среќни. Сепак, колку и да се трудите, во една фаза од развојот, децата почнуваат постојано да се муртат и да се жалат на се, што секако почнува да ве фрустрира и нервира.
Иако зборуваме за деца кои негодуваат, важно е да се знае дека ваквото однесување не е резервирано само за малите деца, туку и за постарите, дури и тинејџерите понекогаш го прават тоа.
Негодување/муртење – кога детето налутено ја стега устата и обично ги прекрстува рацете за да ви даде до знаење дека е луто – всушност е тивок тантрум што се јавува кај многу деца. Децата кои “дурлат“ често се нерасположени и ги искажуваат своите емоции со кисел израз на лицето или жалење за нешто. Тие го прават тоа за да го покажат својот негативен одговор на средината во која се наоѓаат, најчесто кога се лути, фрустрирани и слично. Кај некои деца, иако е поретко, негодувањето може да биде и симптом на посериозно нарушување на расположението.
Пред да преминеме на тоа како да се изборите со деца кои постојано негодуваат, ќе ги наброиме причините зошто децата се однесуваат вака:
- Тие сè уште не знаат како да ги изразат своите чувства на подобар, поприфатлив начин
- Нивната емоционална интелигенција сè уште не е доволно развиена
- Тие се плашат да ги изразат своите чувства со зборови
- Се обидуваат да манипулираат со вас
- Тие го сакаат вашето внимание
Како да се однесувате кон дете кое негодува и се дурли
Постојат многу начини како даизлезете на крај со вакво однесување, а еве неколку идеи кои можат да помогнат.
Без последици
Со карање или обид да го вразумите детето, најверојатно нема да добиете ништо во овие ситуации. Всушност, најдоброто нешто што можете да направите е да го пуштите да негодува. Не му „попуштајте“ и не му посветувајте премногу внимание, бидејќи тогаш и во иднина ќе продолжи да го бара вашето внимание на овој начин. Игнорирањето, пак, ќе помогне да се намали оваа навика на детето во помала мера бидејќи детето ќе разбере дека не реагирате на ваквото однесување.
Правило против негодување
Потребно е време да го научите вашето дете да не се однесува така, но може да помогне ако се договорите дека правилото е да дома нема дурлење и негодување. Така детето со тек на време ќе сфати дека нема никаков ефект да негодува ако вие не го гледате дека го прави тоа и само ќе престане.
Бидете грижливи
Квалитетното време што го поминувате со вашето дете има многу позитивно влијание врз неговиот раст и развој. Обидете се да му дадете доволно внимание и нежност, тоа ќе му помогне на детето да биде среќно и да ги изразува своите емоции на здрав начин, за да нема потреба од негодување.
Охрабрете го детето да ги изразува чувствата со зборови
Кога ќе забележите дека детето се дурли, обидете се да го поттикнете да ги изрази своите чувства со зборови. Ова може да му помогне да ги исфрли негативните емоции на начин што ќе можете да го разберете и да го охрабрите да го прави тоа почесто. Едноставно, целта е да го научите дека вербалната комуникација е поздрава и поефикасна.
Не реагирајте бурно
Кога вашето дете ве нервира со неговото негодување, обидете се да останете смирени и да не го карате, да не реагирате бурно. Ако мислите дека детето само бара од вас внимание без посебна причина, игнорирањето е единствениот начин да го натерате да разбере дека таквото однесување не е убаво или прифатливо.
Проверете ја причината
Ако детето често негодува, размислете што се случува околу него, дали е под стрес. Не поставувајте преголеми очекувања од детето, охрабрете го да има време и за игра покрај учењето, обидете се да не му ја пренесувате вашата напнатост или фрустрации, бидејќи тоа само ја зголемува анксиозноста.
