Иако не ви се чини дека вашето тукушто родено бебе во првите месеци би можело да учи, сите негови сетила функционираат и тоа чувствува, гледа, слуша и ги прима сите мириси од околината. Затоа, веднаш на почетокот вклучете се во растењето на своето бебе и учете го. Доколку нежно му зборувате, го галите и му пеете, бебето брзо ќе научи дека го сакате.
Што бебето може да научи
Лицата на родителите се првата и најдрага играчка на бебињата. Бебето сака да ве гледа, да ја потпре главата на вашето лице и да го слуша вашиот глас. Иако бебето покажува интерес за сите звуци, на мајчиниот глас посебно реагира. Брзо ќе почне тој глас да го поврзува со се што ми треба: храна, топлина и допир.
Што родителите треба да прават
Новороденчињата сакаат внимание. Разговарајте со бебето, читајте му, пејте му, галете го и бакнувајте. Дајте му на бебето едноставни играчки со мазна површина кои произведуваат звуци и се со јаки бои. Силниот контраст ќе го заинтересира бебето и ќе му помогне да се фокусира на играчката. Играњето е за бебето начин на учење, додека на поголемите деца тоа им претставува забава. Затоа, секој вид на играње со новороденчето е и начин на учење на нови работи.
ЕВЕ НЕКОЛКУ ИДЕИ
ТАНЦ: Пуштете музика и земете го бебето во прегратка. Доближето го негоото лице на своето и лесно движете се во ритамот на музиката, пеејќи му на бебето на уво.
ИМЕНУВАЈТЕ: Допирајте и именувајте ги деловите на телото на бебето. Повторувајте го тоа секој ден.
ГУШКАЊЕ: Секогаш кога бебето е будно, гушнете го и галете го за време на пресоблекувањето. Допирот допринесува детето да се чувствува безбедно.
ВАЖНО – Доколку имате било каков сомнеж дека бебето не гледа или не слуша добро, отидете на педијатар. Ако е се во ред, ќе се ослободите од грижата, а ако постои било каков проблем, колку порано тој се открие, полесно ќе биде лекуван.
