Многу бремени жени, кои се приближуваат до терминот за породување, би сакале да знаат кои се знаците кои го означуваат неговиот почеток затоа што сакаат да се подготват за она што наскоро ги очекува и да направат сè навреме, со што е можно помалку стрес.
Можни знаци на приближување на породувањето
Тешко е точно да се предвиди кога ќе започне породувањето, лекарите отприлика тоа го предвидуваат на почетокот на бременоста со утврдување на крајниот термин, но понатаму, како што ја следат бременоста знаат и да го коригираат.
Но, кога терминот навистина и ќе се приближи, постојат одредени знаци кои укажуваат на тоа породувањето се приближува:
- Спуштање на плодот;
- Губење на тежината или престанок на добивање на тежина;
- Вагинален исцедок;
- Подготвителните контракции стануваат се почести;
- Притисокот е се поголем;
- Кај некои жени се јавува дијареја неколку дена пред или на денот на породувањето;
- Грлото на матката се скратува и омекнува, а мукозното чепче кое го затвора се исфрла надвор, проследено со лесна сукрвавица.
Невообичаени знаци кај некои бремени жени
Понекогаш бремените жени опишуваат дека имаат вишок енергија, енергично ја чистат куќата, некои дури и ги мијат прозорците. Овој феномен се нарекува инстинкт на гнездење. Сепак, колку и да се подготвуваат бремените жени, факторот изненадување е скоро секогаш присутен. На крајот, не грижете се премногу – ќе бидете подготвени исто како што биле и многу трудници пред вас.
