Настинки, инфекции, вирози…, тоа ни се допаѓало или не, составен дел од животот на секое дете и нешто без кое детството е назамисливо. Сепак, има многу нешта кои може да ги превземете за да го намалите бројот ан денови кои најмалите ќе ги поминат болни.
Децата секојдневно се изложени на огромен број на штетни микроби и вируси и за жал, бројни болести на некој начин се составен дел од растењето. Сите на овој свет доаѓаме со имун систем кој е неискусен, а искуството се стекнува токму борејќи се со бројни микроорганизми. Тоа е причината зошто секој педијатар ќе рече дека шест до осум настинки, вирози или инфекции на уво годишно се нормална работа. Но, постојат неко здрави навики со чие усвојување ќе го зајакнете имунитетот на детето и ја намалите зачестеноста на болестите и ќе му помогнете да, и ако се разболи, полесно и побрзо го преброди тој период.
Воведете повеќе овошје и зеленчук во менито
Морков, портокал, јаболка, јагоди: сите тие се намирници што содржат каротеноиди, фитонутриенти кои го зајакнуваат имунитетот. Фитонутриентите можат да го стимулираат производството на бели крвни клетки и интерферон во организмот, а нивната улога е токму спречување на инфекциите. Интерферонот е антитело кое ја обложува површината на клетките и спречува влегување на вирусите во нив. Истражувањата покажуваат дека исхраната богата со фитонутриенти може да го заштити организмот и од многу хронични болести, подоцна во животот. Значи, вреди да се потрудите да го натерате вашето дете секојдневно да изеде пет мини оброци овошје и зеленчук.
Обезбедете им доволна количина на сон
Научно е докажано дека недостаток на сон го прави организмот поподложен на инфекции и разни други болести затоа што го намалува бројот на НК клетки или таканаречени природни клетки убијци кои се оружје на нашиот имун систем во борбата против разни микроби. Имајте предвид дека за оптимална состојба на имунитет, на бебињата им треба до 16 часа сон, на децата кои одат во градинка од 11 до 14 часа сон, а децата на предучилишна возраст и учениците од пониските одделенија од 10 до 13 часа.
На воздух со нив!
Охрабрете го вашето дете што повеќе време да минува во игра на свеж воздух во текот на целата година. Истражувањата покажале дека физичката активност го зголемува бројот на НК клетки, а за да го натерате детето да спортува, треба да му бидете добар пример. Значи, наместо да поминувате време заедно пред ТВ-екраните, излезете со нив на возење велосипед, прошетка, играње фудбал, трчање, ролерки … Ова е потребно, не само заради свежиот воздух и физичката активност кои се клучни компоненти за да се постигне силен имунитет, туку и поради витаминот Д, чие производство во организмот бара изложување на сончева светлина. Неодамнешните научни откритија ја потврдуваат клучната улога на витамин Д во одржувањето на оптималната имунолошка функција, па доколку е потребно, воведете го овој витамин со додатоци на исхрана, во текот на зимата.
Не заборавајте на храна богата со пробиотици
Здравата цревна флора е темел на добриот имунитет, а најдобриот начин да се постигне ова е децата од мали нозе да ги навикнете да консумираат храна богата со пробиотици, како што се кефир, јогурт, меки сирења, кисели краставички или кисела зелка.
Шеќери надвор, овошје внатре!
Докажано е дека шеќерот ги храни штетните бактерии кои потоа можат да се размножат и да бидат побројни од оние корисни бактерии кои го зголемуваат имунитетот. Ако му посакувате добро на вашето дете, немојте да го затрупувате со слатки, туку со овошје, а слатките треба да бидат само повремени исклучоци, а не секојдневна храна.
