Грипот е една од најчестите заразни болести предизвикани од вирусот на инфлуенца. Се појавува сезонски и е многу заразен, а претежно започнува нагло. Една од главните карактеристики е можноста за мутација односно менување. Токму на овој начин може да се разболиме од грип повеќе од еднаш.
♦♦♦♦♦♦♦
Вирусот на грип се пренесува преку честички во воздухот, најчесто после кивање или кашлање на лице во чиј организам се наоѓа вирусот. Сепак, може да се пренесе и преку директен контакт со заразено лице, и преку заразени предмети. Лицето кое е инфицирано е заразно еден ден пред појавата на симптомите. Инфективноста трае помеѓу пет и седум дена од почетокот на симптомите.
Времето на инкубација, односно времето од инфекција до појава на симптоми, е до три дена. После тоа, болеста започнува нагло, а симптомите се појавуваат многу брзо. Тоа се висока температура, главоболка, лоша општа состојба, болки во мускулите, треперење, повраќање. Респираторните проблеми се јавуваат дополнително. Токму на овој начин можеме да разликуваме настинка од грип – кај настинката, респираторните проблеми доаѓаат први.
Грипот обично поминува за седум до десет дена. Тогаш се повлекуваат симптомите, но заморот, па дури и кашлањето, може да останат уште неколку недели. Важно е да се знае дека за грип не треба да се земаат антибиотици, туку лекови по потреба – антипиретици, аналгетици, пастили за грло… Грипот поминува сам по себе, бидејќи е вирусно заболување.
Времето на инкубација, односно времето од инфекција до појава на симптоми, е до три дена
Важно е да се нагласи дека грипот е најчесто минлива болест, но сепак, зема околу половина милион животи годишно. Иако некогаш се сметаше дека децата полесно го преболуваат грипот, денес се знае дека не е така. Компликациите на грип се почести токму кај постарите лица и кај децата. Покрај тоа, луѓето кои се хронично болни и луѓето кои имаат нарушен имунолошки систем се изложени на поголем ризик.
