ПИШУВА:
Катерина Шекеровска-Димовска
katerina@pedijatar.mk
Хроничната кашлица е честа компликација кај децата. Може да биде симптом на многу сериозни состојби и компликации со можни трајни последици. „Главна цел е да се дијагностицира болеста или состојбата и да се препознаат факторите на ризик“, објаснува проф. д-р Татјана Јаќовска, специјалист педијатар – пулмоалерголог и претседател на Македонско педијатриско респираторно здружение (МПРЗ).
Токму на оваа тема, „Хронична кашлица кај деца и асоцирани болести“, од 5 до 7 мај во хотелот „Дрим“ во Струга ќе се одржи првиот симпозиум на Македонското педијатриско респираторно здружение, новоформирано стручно здружение на медицински здравствени работници, кое има за цел да ја зголеми свесноста за педијатриските белодробни пореметувања, да го олесни напредокот во дијагностиката и третманот и да промовира истражувања во полето на педијатриска пулмологија. На Симпозиумот се добредојдени специјалисти и специјализанти по педијатрија, супспецијалисти по пулмологија, семејни доктори и доктори на школска медицина, микробиолози, хирурзи, ОРЛ специјалисти и други.
Во тек се подготовките за еден убав стручен настан, прв симпозиум на Македонското педијатриско респираторно здружение (МПРЗ), со работен наслов „Хронична кашлица кај деца и асоцирани болести“, којшто ќе се одржи од 5 до 7 мај во хотелот „Дрим“ во Струга. Практично, претстојниот симпозиум ќе значи и официјална промоција на новоформираното Македонско педијатриско респираторно здружение (МПРЗ). Најпрво, дозволете да Ви честитам и да Ви посакам долги години на успешна и плодна работа. Од каде произлезе идејата за формирање на Здружението и кои се целите и плановите на МПРЗ?
Проф. д-р Јаќовска: Македонско педијатриско респираторно здружение е новоформирано стручно здружение на медицински здравствени работници кои имаат цел да ја зголемат свесноста за педијатриските белодробни пореметувања, да го олеснат напредокот во дијагностиката и третманот и да промовираат истражувања во полето на педијатриска пулмологија. Специфичните педијатриски проблеми како респираторни инфекции, превенција на инфекциите, детската астма, атопичниот дерматит, латентната туберкулоза, пореметувањата на дишење кај најмалата популација се многу важни за рана дијагноза и третман. Имено постојат повеќе респираторни адултни здруженија во кои ние сме членови, но пулмоналните проблеми кај децата се многу различни од оние кај возрасната популација. Сите ние сме членови на Европско респираторно здружение каде постои посебен дел од областа педијатриска пулмологија, од тука идејата за посебно педијатриско респираторно здружение.
Здружението има повеќе цели, односно да ја истражи локалната инциденца на белодробни заболувања, да ги идентификува локалните карактеристики на болестите вклучувајќи морбидитет и морталитет, да развие национални водичи за дијагноза и третман на вообичаените педијатриски пулмолошки пореметувања, да обезбеди едукација и тренинг на здравствени работници во полето на педијатриската пулмологија, да промовира јавна свест преку различни медиуми вклучувајќи печатени и електронски медиуми, јавни семинари и локално истражување во педијатриската пулмологија. Една од целите е и професионална комуникација со останатите педијатриски пулмонални здруженија од околината заради унапредување на здравјето на најмалите пациенти.
Темите кои ќе бидат опфатени за време на симпозиумот се: ЦФ/ТБЦ, алергологија, пулмологија, респираторни инфекции, пореметување во дишење, микробиологија/антибиотици, исхрана/пробиотици, хирургија/ОРЛ
Каков е интересот за симпозиумот и кои се темите кои ќе бидат обработени во Струга?
Проф. д-р Јаќовска: Интересот за симпозиумот е голем поради главната тема, хронична кашлица која е честа компликација кај децата. Хроничната кашлица кај деца може да биде симптом на многу сериозни состојби и компликации со можни трајни последици, и затоа е важно на време да бидат препознаени. Главна цел е да се дијагностицира болеста или состојбата и да се препознаат факторите на ризик.
Темите кои ќе бидат опфатени за време на симпозиумот се: ЦФ/ТБЦ, алергологија, пулмологија, респираторни инфекции, пореметување во дишење, микробиологија/антибиотици, исхрана/пробиотици, хирургија/ОРЛ.
Специфичните педијатриски проблеми како респираторни инфекции, превенција на инфекциите, детската астма, атопичниот дерматит, латентната туберкулоза, пореметувањата на дишење кај најмалата популација се многу важни за рана дијагноза и третман
За кого е наменет, дали е со меѓународно учество и дали може да ни откриете дел од предавачите кои ќе дискутираат за повеќе патолошки состојби кои се поврзани со хроничната кашлица кај децата?
Проф. д-р Јаќовска: Симпозиумот е наменет за специјалисти и специјализанти по педијатрија, супспецијалисти по пулмологија, семејни доктори и доктори на школска медицина, микробиолози, хирурзи, ОРЛ специјалисти и други. На Симпозиумот ќе презентираат врвни предавачи од странство и Северна Македонија, ќе ги изнесат своите искуства и ставови во дијагностика и лечење на бројни патолошки состојби кои можат да бидат причина за кашлица кај децата. Тоа се предавачи од Англија, Кембриџ Универзитет – Дона Мекшејн, Андрес Флото, професори од Србија, Институт за мајка и дете – проф. д-р Александар Совтиќ, Институт за ТБЦ – проф. д-р Зорица Живковиќ, директорот на педијатриска клиника во Крагуевац – проф. д-р Анѓелка Стојковиќ, професори од болница Сребрњак – проф. д-р Мирјана Туркаљ, проф. д-р Давор Плавец и многу други домашни предавачи.
Кога кашлицата се дефинира како хронична и кога треба да претставува аларм за родителите да посетат лекар?
Проф. д-р Јаќовска: Кога кашлицата трае повеќе од четири недели кај деца или два месеца кај адолесценти, зборуваме за хронична кашлица. За родителите аларм треба да биде подолготрајна кашлица кога треба да се јават на пулмоалерголог.
Клучно за ефикасен третман е утврдување на причината за појава на хронична кашлица. Кои се најчестите причини што доведуваат до истата?
Проф. д-р Јаќовска: Се јавува кај деца што имаат и други заболувања (цистична фиброза, туѓо тело во дишни патишта, имунодефициентни состојби, синузити, алергии, астма, пертусис, конгенитални малформации, гастроезофагеален рефлукс, бронхитис и сл). Терапијата е во зависност од причината на кашлицата.
Сирупите против кашлица не се препорачуваат за деца помали од две години, а истите не треба да се земаат на своја рака ниту кога се работи за деца постари од две години. Зошто е потребно дополнително внимание од страна на родителите и кои се несаканите ефекти кои може да се кријат во некои сирупи против кашлица за деца?
Проф. д-р Јаќовска: Некои сирупи се муколитици, односно го разградуваат секретот, го прават течен и треба да се искашла, инаку ќе ги преполни дишните патишта. Малите деца не можат да искашлуваат и тука е опасноста од нивната употреба. Некои сирупи содржат супстанци кои ја супримираат кашлицата на централно ниво, и тоа не е добро затоа што кашлицата е комплексен рефлекс за чистење на дишните патишта.
