Исхраната пред зачнувањето и раната бременост која содржи многу овошје, зеленчук, морска храна, млечни производи, јајца и житарки може да биде поврзана со намален ризик од спонтан абортус, сугерира анализа на 20 истражувања.
Ова се намирници кои обично сочинуваат здрава урамнотежена исхрана, а претходните докази покажале дека добро заокружената исхрана богата со витамини и минерали е важна за време на бременоста.
Со прегледот на истражувањата е утврдено дека, во споредба со ниската консумација, големиот внес на овошје може да биде поврзано со 61 процент намалување на ризикот од спонтан абортус. Високиот внес на зеленчук може да биде поврзан со 41% намалување на ризикот од спонтан абортус. Кај млечните производи ова е намалување од 37%, кај житариците 33%, кај морските плодови и јајцата 19%.
Се смета дека комплетната исхрана која содржи целокупна здрава храна или храна богата со извори на антиоксиданти, со низок процент на проинфламаторна храна или групи на нездрава храна може да биде поврзана со намалување на ризикот од спонтан абортус кај жените.
Исто така, треба да се спомене дека исхраната богата со преработена храна се покажала поврзана со двојно зголемување на ризикот од спонтан абортус.
Спонтаниот абортус е вообичаен, а проценките покажуваат дека 1 од 6 бремености завршуваат со спонтан абортус, а познати се многу причини, од проблеми со хромозомите на бебето до инфекции во утробата. Сепак, речиси 50% од загубите на рана бременост остануваат необјаснети, а во отсуство на причина, родителите честопати се обраќаат до нивните здравствени работници за насоки за најдобрите начини да бидат што е можно поздрави и да го намалат ризикот од идни спонтани абортуси.
Инаку, има се повеќе докази дека промените во животниот стил – вклучувајќи промени во исхраната, престанок со пушење и не пиење алкохол – пред зачнувањето и почетокот на бременоста – може да имаат влијание врз исходот на бременоста.
Извор: Fertility and Sterility
