Во текот на првите шест месеци од животот на бебето, Националната здравствена служба (NHS) не препорачува ништо друго освен мајчино млеко. Тоа содржи многу хранливи вредности и здравствени придобивки.
Според ново истражување, мајките кои ги дојат своите малечки подолго од половина година имаат помала веројатност да им понудат слатки или солени грицки пред нивниот прв роденден. Ова значи дека подолгото доење на бебето всушност може позитивно да влијае на изборот на здрава храна.
Во најновата студија спроведена од Универзитетот во Глазгов, истражувачите ја проучувале врската помеѓу доењето и процесот на одвикнување.
Во анкетата учествувале 2730 мајки. Од анкетираните, 20 отсто од бебињата биле хранети исклучиво со адаптирано млеко, додека 48 отсто продолжиле да дојат по шест месеци. Истражувањето покажало дека 15 отсто од доените бебиња поретко добивале слатки и грицки, за разлика од 45 отсто од бебињата хранети со адаптирано млеко.
Здравите прехранбени навики се развиваат уште на рана возраст
Студијата исто така открила дека е помалку веројатно бебињата кои се доени шест месеци ќе бидат хранети со комерцијална детска храна.
Водачот на студијата д-р Ада Гарсија објаснува: „Во нашата студија воочивме дека разликите во исхраната започнуваат веќе на возраст од шест до 12 месеци. Ова е загрижувачко, бидејќи прехранбените навики се развиваат рано во животот, а подоцна е потешко да се променат. Нашето истражување сугерира дека продолжувањето со промовирање на доењето може да помогне да се развијат здрави навики во исхраната и да се заштити здравјето на доенчињата“.
Значи, истражувањето сугерира дека подолгото доење може да резултира со поздраво хранење на децата кога почнуваат да се воведуваат и други оброци освен мајчиното млеко.
