Нејасно е во која мера децата можат да го шират новиот коронавирус, но нова студија укажува на тоа дека е можно да го пренесуваат лесно како заразени возрасни лица, велат истражувачи од Швајцарија.
“Помалку деца од возрасни се заразени со новиот коронавирус, и помалку од нив развиваат тешка форма на болеста КОВИД-19, и се чини дека тие не се главни покренувачи на пренесувањето на заразата, но деца од сите возрасти сепак се заразени“, велат истражувачите.
Тие велат дека имаат причина да веруваат дека човечкиот имунитет е поголем отколку што покажуваат тестовите на антитела.
“И покрај високиот процент на благи или асимптоматски инфекции, тие треба да се сметаат за пренесувачи, доколку не се докаже дека е поинаку“, заклучиле истражувачите од Универзитетот во Женева.
Во истражувањето кај 23 деца на возраст од седум дена до 16 години, тестот на КОВИД-19 бил позитивен, а сите, освен две деца, во себе носеле иста количина на вирусот, како и возрасните.
“Нашите податоци покажуваат дека вирусното оптоварување во дијагнозата е споредливо со она кај возрасните и дека симптоматските деца на сите возрасти имаат предуслов за понатамошно ширење на вирусот во рана акутна фаза“, велат научниците.
Меѓутоа, се чини дека децата не го шират вирусот на ист начин како што тоа го прават возрасните.
“Земајќи ја предвид релативно малата зачестеност на заразени деца, дури и во тешко погодените подрачја, биолошки или друг непознат фактор може да доведе до послаб пренос на заразата“, велат авторите на истражувањето.
Тие велат дека се потребни уште истражувања за во целост да се разбере улогата на децата во ширењето на новиот коронавирус.
