Децата кои биле изложени на мали количини на кофеин пред раѓањето се во просек пониски од децата чии мајки не консумирале кофеин за време на бременоста, покажуваат резултатите од најновото истражување, пренесува Си-Ен-Ен.
Експертите утврдиле дека децата изложени на кофеин биле пониски на четиригодишна возраст, а оваа разлика се зголемила по осумата година. Разликите во висината не се големи, но постојат, наведуваат експертите.
На бремените жени им се препорачува да консумираат помалку од 200 милиграми кофеин дневно. Шолја инстант кафе има околу 100 милиграми, а шолја филтрирано кафе има околу 140 милиграми. Додека една шолја чај со кофеин има околу 75 милиграми.
Загриженоста постои, истакнуваат експертите, бидејќи доколку понискиот раст во раното детство продолжи и во возрасниот период, постои ризик од срцеви заболувања и дијабетес, кои се поврзани со понизок раст.
Но, сè уште не може да се утврди, додаваат тие, дали оваа разлика во растот меѓу децата ќе продолжи и во возрасниот период.
