Иако бремените жени воглавно имаат благи симптоми на коронавирус, тие можат да траат два месеци или повеќе кај секоја четврта жена, покажува студијата објавена во списанието „Obstetrics and Gynecology“.
Најчести симптоми кај жените биле кашлица, болки во грлото, болки во телото и треска
Истражувачите од Универзитетот Калифорнија во Сан Франциско и UCLA испитувале 594 жени ширум САД кои биле позитивни на тестот за Ковид-19 за време на бременоста. Откриле дека 40 проценти од жените имале симптоми кои траеле четири недели, а 25 проценти имале симптоми кои траеле осум недели или подолго.
Најчести симптоми кај жените биле кашлица, болки во грлото, болки во телото и треска, а симптомите биле најзастапени во првите три недели. Просечното времетраење на симптомите било 37 дена. Повеќето од учесничките, 95% од нив, не биле хоспитализирани.
Учесничките биле вклучени во студијата помеѓу 22 март и 10 јули оваа година. Повеќе од половина од жените имале контакт со некој кој имал позитивен тест на Ковид-19 или имал симптоми. Околу 30 проценти од жените биле здравствени работници, а 60 проценти биле белкинки.
„Симптомите на Ковид-19 за време на бременоста можат да траат долго и да имаат значително влијание врз здравјето“, вели авторката на студијата, д-р Ванеса Џејкоб.
