Истражување на американски лекари и научници покажало дека кај доенчињата и малите деца кои се изложени на загаден воздух е воочена поголема веројатност да заболат од астма.
„Студијата што ја спроведовме покажа дека просечната количина на ситни честички и просечното загадување на воздухот со азот диоксид во текот на првите три години од животот на децата се поврзани со појавата на астма во раното и средното детство“, се резултатите од студијата објавена од Американското здружение на лекари (AMA).
Поголем ризик кај пониските слоеви на општеството
Истражувањето во кое учествувале научници од Харвард и детската болница во Синсинати, укажува на тоа дека доенчињата од „миноризираните и статусно пониски слоеви на општеството“ се соочуваат со поголем ризик од развој на оваа болест, што тие го припишуваат на намалениот пристап до почист воздух.
Бебињата од афро-американските семејства кои живеат во „густо населени заедници, а се карактеризираат со намалени финансиски можности и ресурси“ би можеле да развијат астма, заклучиле во студијата објавена кон крајот на февруари.
Научниците ги повикаа локалните власти да вложат повеќе напори за намалување на загадувањето на воздухот и „да создадат поголема еколошка, образовна и здравствена правда на ниво на заедницата“.
Во Азија, две третини од смртните случаи се поврзани со загадувањето на воздухот
Друга група научници неодамна укажала на поврзаноста помеѓу зголемената антимикробна отпорност и загадувањето на воздухот. Се покажало дека влијае на возачите и патниците кои во своите автомобили престојуваат подолго отколку што претходно се мислело.
Претходни истражувања укажуваат на тоа дека на глобално ниво, приближно две третини од смртните случаи се поврзани со загадениот воздух во Азија, но нивоата на загаденост на воздухот во Европа и Северна Америка и понатаму се над нивоата што се сметаат за здрави.
