Исхраната на децата во училишна возраст често знае да биде вистински предизвик – и за родителите, и за самите деца. Тоа е период кога тие интензивно растат, се развиваат, учат и се соочуваат со нови обврски. Затоа, потребна им е храна која не само што ги заситува, туку и им дава енергија, концентрација и јакнење на имунитетот.
Во овој период е особено важно да се создадат здрави навики и да се вклучат намирници кои се нутритивно богати – меѓу нив, јаткастите плодови се едни од највредните. Тие се природен извор на здрави масти, витамини, минерали и протеини, кои позитивно влијаат врз целокупниот развој на децата.
Кои јаткасти плодови се најкорисни за децата?
Кикирики
Иако технички припаѓаат на семејството на мешунки, кикириките по изглед и нутритивен состав се многу блиски до јаткастите плодови. Богати се со здрави масти и протеини – одлична ужинка за фокус и енергија.
Бадеми
Одличен избор за деца кои не консумираат млеко – бидејќи се природен извор на калциум. Исто така содржат витамин Б и магнезиум, што ги јакне имунитетот и срцето.
Ореви
Најдостапни и многу корисни – содржат антиоксиданти кои го штитат телото од слободни радикали. Особено се богати со омега-3 масни киселини, кои го поддржуваат развојот на мозокот и добриот холестерол.
Бразилски ореви
Најбогат природен извор на селен – минерал што ја подобрува функцијата на тироидната жлезда и помага во борбата против инфекции. Но внимание: доволен е само еден орев дневно!
Индиски ореви (кашу)
Содржат железо, па се особено важни за девојчињата во пубертет, кои често се склони кон анемија. Плус, имаат благ вкус што децата го обожаваат.
Ф’стаци
Богати со витамин Б6 – важен за хормонален баланс, нервен систем и добар вид. Одлични како здрава ужинка во училишна кутија!
Колкава е препорачаната дневна количина?
За дете во училишна возраст, идеалната дневна порција изнесува 30 грама. Тоа изгледа вака:
- 30 ф’стаци
- 20 бадеми или лешници
- 10 половинки орев
- 30 кикирики
Оваа количина му обезбедува на детето:
- ✅ 36% од дневните потреби за витамин Е
- ✅ 13% од потребните влакна
- ✅ 4 грама природни протеини
- ✅ Богатство од Б-комплекс, калциум, цинк, натриум и магнезиум
Напомена: Бразилските ореви се многу концентрирани со селен – не повеќе од еден дневно!
Совет за родителите:
- Понудете ги јатките наутро или како ужинка во училиште. Комбинирајте ги со свежо овошје или јогурт.
- Ако вашето дете има ризик од алергија, воведувајте ги внимателно и по консултација со лекар.
- Избегнувајте солени или пржени јаткасти плодови – секогаш бирајте природни, несолени и непечени.
