Од самото зачнување, па се до престанок на доењето, градите постојано се менуваат. Сепак постојат едноставни начини со кои мајките можат да си го олеснат овој период. Еве неколку совети…
Соодветен градник
Во периодот на доење, многу е важно да бирате памучни градници кои не ги стегаат градите, но нудат стабилна потпора. Моделите со корпи и фишбајн не се добар избор бидејќи можат да ве стегаат, но и да ви попречуваат доењето, односно производството на млеко. Исто така, градниците за доење се удобни, можете со нив да спиете доколку градите ви се болни во текот на ноќта.
Избор на креми против стрии
При изборот на препарат за нега на кожата во бременоста и по породувањето, предност се дава на оние средства кои содржат природна основа – етерични масла и билни екстракти. Добри се невенот, камилицата, алоето, маслинката, бадемовото масло, авокадо, какао и ши путер, како и пчелин восок.
Избегнувајте препарати веднаш по породувањето
Непосредно по породувањето, на градите не треба да се нанесуваат никакви креми, ниту масла. Подоцна, кога бебето ќе научи да цица, може да се користат проверени средства за нега. Вештачките супстанци ги запушуваат порите и не ја хранат кожата, која поради тоа станува подложна на стрии.
Внимавајте на исхраната
За да спречите појава на стрии, важно е и правилно да се храните. Треба да се пијат што е можно повеќе течности и да се јаде овошје и зеленчук, односно намирници кои содржат витамини Е и Ц, но и оние кои содржат протеини. Ограничете го внесот на сол, за да ја намалите задршката на течности, а со тоа и отекување на градите.
Студени облоги
Доколку градите ви се жешки и болни, ставете студени облоги. Одлично помага и разладен лист од зелка: ставете главица зелка во фрижидер или замрзнувач. Откако доволно ќе се олади, откинете лист и ставете го во градникот. И топлата купка може да помогне при оток на градите.
