Родителите добро го познаваат тој момент: летото завршува, децата се враќаат на училиште, а со есента доаѓаат настинките, вирусите и воспаленијата. Некои деца постојано „фаќаат“ нешто, додека други минуваат низ сезоната речиси без болести. Иако понекогаш изгледа како среќа, разликата најчесто се крие во начинот на живот – во исхраната, спиењето и секојдневните навики кои влијаат на имунитетот. Тука родителите играат клучна улога.
Имунитетот почнува уште од раѓање
Кејша Венета, мајка на шест деца, верува дека доењето е причината зошто нејзините деца ретко се разболуваат. „Сакав да им го дадам најдобриот можен почеток. Знаев колку е важно доењето“, вели таа.
Педијатарката д-р Андреа Теодор објаснува дека новороденчињата имаат незрел имунитет. „Мајчиното млеко содржи антитела кои го штитат бебето додека неговиот имунитет се развива“, објаснува таа.
Доколку доењето не било можно, важно е да се зајакне цревната флора – бидејќи голем дел од имунитетот се наоѓа токму во цревата. Нутриционистката Лаура Иу препорачува во исхраната да се вклучат пробиотици, како што се јогурт, кефир или кисела зелка.
Превенцијата е половина здравје
Правилната хигиена помага да се спречи ширење на болести. И понатаму се препорачува редовно миење на рацете, особено по игра и пред јадење. „Ова е една од наједноставните, но најефикасни мерки за спречување на инфекции“, вели д-р Теодор.
Вакцинацијата ги штити најмалите
Според насоките на Американската академија за педијатрија, вакцинацијата е од клучно значење, особено кај бебињата и малите деца. „Нивниот имунолошки систем сè уште се развива, па затоа вакцините ги штитат од сериозни болести“, истакнува д-р Синди Бауер.
Исхрана богата со нутриенти
Здравите деца јадат разновидно – овошје, зеленчук и цели (интегрални) намирници. Нутриционистката Иу советува родителите да држат исечено овошје на видно место во фрижидерот. Исто така, важно е децата да се вклучат во набавката и подготовката на храната, за полесно да се одлучуваат за здрави избори. „Не е пресуден секој поединечен оброк – важно е целокупниот начин на исхрана да биде избалансиран“, додава таа.
Спиењето е подеднакво важно како и исхраната
За време на спиењето телото произведува хормони и протеини кои го зајакнуваат имунитетот. Децата треба да имаат доволно сон според возраста – обично меѓу 9 и 12 часа дневно. „Редовен распоред за спиење и избегнување на екрани пред легнување му помагаат на детето подобро да спие“, вели д-р Теодор.
Средина без стрес и со чист воздух
Здравиот дом има добра воздушна средина и што е можно помалку извори на стрес. Важно е да се намали изложеноста на чад од цигари и други загадувачи, но и да се внимава на емоционалното здравје на детето.
Стресот може да го ослаби имунитетот. „Децата кои се анксиозни или под притисок може да заболат и физички. Разговарајте редовно со нив, слушајте ги и бидете нивна поддршка“, советува д-р Теодор.
Нечистотијата не е секогаш лоша
Иако хигиената е важна, децата треба да имаат одреден контакт со микробите од околината. Изложеноста на природа, земја и домашни миленици помага во развој на поотпорен имунитет и дури може да го намали ризикот од алергии.
Кога да се консултирате со лекар?
Ако забележите дека детето често се разболува, консултирајте се со педијатар. Д-р Карла Гарсија Карењо препорачува да се побара стручно мислење во следниве случаи:
- Чести или необично тешки инфекции
- Симптоми што постојано се повторуваат – температура, замор, слабост
- Веќе постоечки дијагнози како астма, срцеви маани или имунолошки нарушувања
- Знаци на сериозна инфекција: отежнато дишење, висока температура, осип, летаргија или одбивање храна
