Секогаш се восхитуваме на луѓе кои, и покрај животните предизвици, остануваат цврсти и силни, а по секое паѓање стануваат уште посилни. Иако често се мисли дека отпорноста е вродена особина, таа всушност е резултат на научени вештини и стекнати искуства. Одгледувањето отпорни деца денес е поважно од кога било – покрај вообичаените предизвици на растењето, децата се соочуваат и со закани како насилство во училиштата и влијанието на социјалните мрежи, поради што многумина чувствуваат притисок, анксиозност и депресија.
Социјалниот работник со повеќе од 50 години искуство, Роберт Таиби, за Psychology Today ги сподели своите совети за тоа како родителите можат да им помогнат на децата во градењето на оваа важна вештина.
- Помогнете им да научат да решаваат проблеми
Животот е полн со предизвици, а отпорноста се гради токму преку способноста за справување со нив. Научете ги децата да ги анализираат проблемите, да го разликуваат важното од неважното, да ги разгледаат опциите, да имаат доверба во сопствената интуиција и да преземат конкретни чекори. Кога ќе ги совладаат овие вештини, ќе бидат подготвени да се соочат со предизвици без чувство на беспомошност.
- Помогнете им да ги регулираат емоциите
Децата кои не знаат да ги контролираат емоциите потешко решаваат проблеми. Научете ги да препознаваат кога се појавуваат силни емоции. Дајте им алатки за смирување – длабоко дишење, водење дневник, цртање или прошетка. Со регулирањето на емоциите се овозможува враќање на рационалното размислување и чувство на контрола.
- Поттикнувајте ги да побараат помош
Истражувањата покажуваат дека отпорните луѓе не се оние кои решаваат сè сами, туку оние кои знаат да побараат помош. Кога децата ќе научат да бараат поддршка, развиваат клучни животни вештини – асертивност и ранливост. Воедно сфаќаат дека не се сами и дека светот може да биде безбедно и поддржувачко место.
- Предизвикајте ги да преземат ризици
Отпорноста се развива со излегување од зоната на удобност. Охрабрете ги да се соочат со сопствените стравови – било да е тоа учество во училишна претстава, приоѓање кон симпатија или испробување нешто ново. Со надминување на овие „речиси невозможни“ задачи, децата градат самодоверба и ги согледуваат сопствените способности.
- Фокусирајте се на нивните слабости
Секое дете има свои предизвици – можеби тоа е страв од конфликт, ниска толеранција на фрустрација или претерано критички став кон себе. Препознајте ги најголемите препреки кај детето и работете на нив заедно: „Забележав дека брзо се фрустрираш, ајде да поработиме на тоа“ или „Ми се чини дека ти е тешко да ги изразиш чувствата, како можам да ти помогнам да го промениме тоа?“
- Бидете пример, но и дајте сè од себе
Децата учат гледајќи ги возрасните околу себе. Како вие се справувате со стресот, конфликтите и предизвиците? Работете на сопствената отпорност – управувајте со вашите емоции, преземете одговорност за вашето однесување, бидете отворени и позитивни. Колку повеќе покажувате отпорност, толку полесно ќе ја усвојат и вашите деца.
