Децата се најубавото нешто на светот, но рака на срце, умеат со своето однесување да ги полудат своите родители. Не сте лош родител што понекогаш му викате на вашето дете, но ако ви се чини дека тоа се случува многу, постојат неколку техники кои можат да ви помогнат да останете смирени кога вашето малечко ве полудува.
Игнорирајте однесување што ве нервира
„Моја омилена техника за смирување додека истовремено работите и на подобрување на однесувањето на детето е да го игнорирате. Игнорирајте го секое однесување што ве нервира, со кое детето само бара внимание или што детето го покажува повторно откако веќе сте му кажале „не“, а пружете му многу внимание кога ќе покаже пожелно однесување“, советува клиничката социјална работничка Кетрин Перлман.
Проверете како се чувствувате
„Кога сте повеќе поврзани со своите емоции, можете да направите подобар избор за тоа како ќе реагирате на децата“, вели психологот Трејси Даниел, која советува да одвоите неколку минути во текот на денот и да го направите следново:
- Затворете ги очите.
- Ставете ја едната рака на стомакот, а другата на срцето.
- Забележете ги отчукувањата на срцето, вдишувањата, издишувањата.
- „Скенирајте“ го вашето тело и забележете ги сите сензации.
- На крајот, отворете ги очите и забележете како се чувствувате.
Потсетете се себеси дека сте безбедни
Кога сте блиску да „одлепите“ во момент на лутина или нервоза, нервниот систем тоа го доживува како закана или пречка, па затоа е важно „да му дозволите на вашето тело и ум да знаат дека сте безбедни“, вели тренерот за смиреност Хантер. Кларк-Филдс. Нејзиниот совет е да си повторите неколку пати: „Ова не е итна ситуација, можам да се справам со ова“ или „Му помагам на моето дете“.
„Ресетирајте“ се
Експертот за родителство Девон Канкман советува во моментот кога ќе се налутите, гласно да го кажете името на емоцијата што ја чувствувате, да броите наназад од 50 со прескокнување на три броја (50, 47, 44…) и да земете неколку длабоки вдишувања.
Превртете се наопаку
Оваа положба помага да го смирите нервниот систем, да се зголеми протокот на крв во мозокот и да ви даде нова перспектива, вели Даниел. Таа ве советува да пробате некои едноставни пози за јога, како што се обратна кучешка. детска поза или едноставно да ги ставите нозете на ѕид. За да се смирите уште побрзо, земете пет до десет длабоки вдишувања.
Не можете да избегнете да вашето дете понекогаш ве изнервира со своето однесување, но можете да изберете како ќе реагирате на тоа – обидете се да се смирите со една од овие техники кои ќе ви ги спасат нервите.
