Иако кашлицата кај детето во повеќето случаи е честа појава, особено за време на настинки и ретко е причина за загриженост, понекогаш може да биде знак за посериозни здравствени проблеми. Како што објаснуваат педијатрите, кашлањето всушност му помага на детето полесно да ја исфрли слузта од задниот дел на грлото, која обично се акумулира доколку му тече нос.
Но, постојат одредени предупредувачки знаци кои може да укажуваат на тоа дека на детето му е потребна медицинска помош. Д-р Сара Џарвис, општ лекар и клинички советник, тврди дека кашлањето е навистина многу честа појава кај децата, особено во есенските и зимските месеци. Таа додава дека огромното мнозинство се предизвикани од вируси, а кашлицата генерално ќе се смири сама во рок од неколку дена.
Таа исто така нагласува дека во некои случаи кашлицата може да биде знак за посериозен здравствен проблем кај детето, а тогаш ни случајно не смее да се игнорира.
Еве како да знаете дека кашлицата не е безопасна, туку е потребно веднаш да се однесе детето на педијатар бидејќи е во прашање нешто поопасно. Тие симптоми вклучуваат:
- Отежнато дишење
- Кашлица која звучи како лаење
- Покачена температура која е невозможно да се намали
- Кашлица која трае со недели или се влошува
- Искашлување крв
- Болки во градите.
Во случај да се појават горенаведените симптоми заедно со кашлицата, д-р Џарвис апелира родителите веднаш да одат на лекар, бидејќи бо можело да се работи за воспаление на белите дробови или пневмонија, астма, РСВ или инфекција на дишните патишта.
